Hatutan.com, (27 Abríl 2022), Díli—Comissão Anti Corrupção (CAC) hamutuk Provedoria Direitus Umanu no Justisa (PDHJ), sei involve parseiru sira atu halo monitorizasaun ba Programa Cesta Bázika, iha tempu badak.

Komisariu CAC ba Servisu Asuntu Prevensaun no Sensibilizasaun, Luis de Oliveira Sampaio akompaña hosi Xefe Unidade Estudu Avaliasaun Rísku hala’o sorumutu prelimináriu ba preparasaun monitorizasaun iha implementasaun programa Cesta-Bázika faze daruak nian hamutuk ho Adjuntu PDHJ José Cristovão ho ekipa iha Edifisiu PDHJ, Caicoli, Dili, Kuarta (27/04/2022). Foto/CAC.

Prosesu involvimentu ne’e, Komisariu Comissão Anti Corrupção (CAC) ba Servisu Asuntu Prevensaun no Sensibilizasaun, Luis de Oliveira Sampaio akompaña hosi Xefe Unidade Estudu Avaliasaun Rísku hala’o ona sorumutu dikusaun prelimináriu ba preparasaun monitorizasaun iha implementasaun programa Cesta-Bázika faze daruak nian hamutuk ho Adjuntu PDHJ José Cristovão ho ekipa iha Edifisiu PDHJ, Caicoli, Dili, Kuarta (27/04/2022).

Lee Mós: Câmara de Contas Hahú Auditoria ba Fundu Covid-19 no Cesta Bázika

Ekipa rua hahú diskute no rai idea hamutuk ona hodi prepara no hatuur mekanizmu no estratejia monitorizasaun ida rigór liu, antes ekipa tékniku sira hosi CAC no PDHJ hamutuk dezloka ba terenu, bainhira programa Cesta-Bázika hahú lansa no implementa iha tempu besik.

Ekipa rua diskute mós katak, sei involve parseiru sira sosiedade sivíl, akadémiku no estudante sira, inklui média sira hodi unifika forsa hamutuk iha kontrolu sosiál ida forte ba programa ne’e hodi kontrola operadór implementasaun programa CB ne’e bele ezekuta didi’ak osan povu nian ho loloos no responsável.

“Diskusaun ohin loke dalan ona ba ekipa rua sei diskute kle’an liu tán no sei involve dikusaun tuir-mai hamutuk ho sosiedade sivíl,” Hatutan.com sita komunikadu.

Antes ne’e, Comissão Anti-Corrupção (CAC) lideradu Komisáriu Sérgio Hornai hamutuk ho Komisáriu Adjuntu Luis Sampaio no ekipa tékniku sira EAK nian, bolu ona ekipa operadór sira no instituisaun nakait sira mai CAC hodi diskute no buka asertasaun.

Iha diskusaun konjunta ne’ebé hala’o iha semana kotuk, CAC aprezenta ona rezultadu monitorizasaun implementasaun programa Cesta-Bázika faze dahuluk nian ne’ebé deskobre irregularidade oioin no hato’o ona rekomendasaun ba instituisaun responsável sira hodi hadi’a poténsia sira ba rísku korrupsaun nian.

Iha diskusaun ne’ebé hala’o hamutuk ne’e CAC akonsella ona autoridade kompetente sira atu servisu ho loloos, evita konflitu interese, hatuur prosedimentu sira implementasaun nian ho rigór nune’e mós assume sira nia responsável nu’udár supervisór ba programa ne’e ho responsável.

Implementasaun programa Cesta-Bázika faze dahuluk nian antes ne’e iha situasaun Covid-19 nia laran, iha ne’ebé kondisaun ne’e la másimu hodi suporta atividade monitorizasaun CAC nian.

Nune’e, ba implementasaun CB faze daruak nian ne’ebé sei mai, CAC hamutuk ho intituisaun kontrolu nakait sira sei halo esforsu másimu hodi halo kontrolu ida rigór iha terenu.

Bainhira CAC identifika no deskobre aktu sira balun ne’ebé kontribui ba Estadu hetan prezuizu, CAC sei la tolera no sei halo intervensaun no atuasaun imediatu iha terenu.

Jornalista: Carmelita Isaac