Hatutan.com (27 Abríl 2022), Díli—Konsellu Ministru (KM) hala’o sorumutuk iha Palásiu Governu, iha Díli, aprova ona projetu Rezolusaun Governu nian ba nomeasaun João Amaral, nu’udár Prezidente Konsellu Fiskál Empreza Públika Bee Timor-Leste (BTL,EP).

Reuniaun KM. Foto/media KM.

Alende ne’e, nomeia mós Regina de Jesus no Acácio Pinto nu’udár vogál Konsellu Fiskál BTL,EP  nian.

Lee Mós: Saláriu Prezidente EDTL $6.500 no BTL $6.000 Boot Liu Prezidente Repúblika

“Kompete ba Konsellu Fiskál, nu’udár órgaun fiskalizasaun BTL,EP, garante kumprimentu hosi norma legál, norma estatutária no norma regulamentár sira ne’ebé aplikavel ba empreza no fiskaliza ninia jestaun finanseira no patrimonial,” Hatutan.com sita komunikadu.

Tuir estatutu sira empreza públika ida-ne’e nian, nomeasaun ne’e propoin hosi Membru Governu ne’ebé responsável ba setór bee no saneamentu nian, Ministru Abel Pires da Silva no hosi membru Governu ne’ebé responsável iha área finansas nian, Ministru Rui Augusto Gomes.

Jornalista: Rogério Pereira Cárceres