Nasionál
“Denúncia Caluniosa” Hasoru Jornalista Hatutan.com Hanesan Notísia Triste ba Liberdade Imprensa TL
Hatutan.com (24 Maiu 2022), Díli—Konsellu Imprensa (KI) konsidera Ministru Asuntu Parlamentál no Komunikasaun Sosiál (MAPKOMS), Francisco Martins da Costa Pereira Jerónimo ne’ebé halo keixa hasoru jornalista no atuál Xefe Redasaun Hatutan.com Francisco Belo Simões da Costa ba “Denúncia Caluniosa” ne’e hanesan triste boot ba Liberdade Imprensa Timor-Leste (TL).
Prezidente CI, Virgílio da Silva Guterres. Foto/Hatutan.com
Prezidente Konsellu Imprensa, Virgílio da Silva Guterres, hanesan mós ema ne’ebé durante ne’e halo advokasia makás ba liberdade imprensa hakarak hato’o katak, denúncia caluniosa ne’e nu’udár notisia triste ba Liberdade imprensa iha TL tanba polítiku ida uza lei hodi kriminaliza servisu jornalizmu.
Lee Mós: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL
Durante ne’e KI halo kampaña katak jornalizmu ne’e la’ós krime, tanba ne’e bainhira MAPKOMS ka kualkér sidadaun sente katak servisu jornalizmu iha buat ruma la loos, Lei Komunikasaun Sosiál nian iha atu rezolve no halo mediasaun la’ós lori kódigu penál akuza jornalista tanba de’it ninia obra jornalístika.
“Ida ne’e notisia triste tanba mai hosi MAPKOMS, ministériu ida ne’ebé governu tau ho kompeténsia no responsabilidade atu garante independénsia média nian, independénsia órgaun komunikasaun sosiál nian. Se ministériu ida-ne’e mak uluk tiha kriminaliza jornalista sira, entaun ita la hatene tán ministériu sira seluk ne’ebé laiha kompeténsia direta kona-bá órgaun komunikasaun sosiál nian,” Virgílio da Silva Guterres hateten ba Hatutan.com via telefónika, Tersa (24/05/2022).
Ki mós konsidera keixa ne’e hanesan notisia triste boot tanba keixa ne’e mosu iha momentu ne’ebé Timor-Leste nia índise Liberdade Imprensa ne’e hetan di’ak hosi 71 ba 17, buat ne’ebé loloos Timor Leste sente orgullu mais depois iha polítiku ida uza artigu kódigu penál ne’ebé sai hanesan demóniu hodi kriminaliza servisu jornalizmu nian.
Notísia triste mós tanba ohin Parlamentu Nasionál (PN) aprova loron 16 Outubru nu’udár loron nasionál Liberdade Imprensa, keixa MAPKOMS nian ne’e sai hanesan notísia aat ba demokrasia no notísia aat ba liberdade imprensa ninian.
KI haree MAPKOMS ne’e la’ós pessoa singular, katak la’ós ema no ne’e instituisaun Estadu nian, ida ne’ebé sente iha reputasaun ka kaluniadu tenke ema individu hanesan Francisco Jerónimo sim, hanesan sidadaun nia iha ida-ne’e, mais hanesan ministru nia labele uza nia pozisaun públiku hanesan ministru atu lori sidadaun ida ba Tribunál, ne’e prinsipiu demokrasia ninian.
“Konsellu Imprensa ami seidauk iha plenária maibé iha plenária mai ami sei diskute liután tanba Xefe Redasaun Hatutan.com ne’e mós hanesan Konsilleiru ida iha KI. Tamba ne’e, ami sei diskute atu marka pozisaun KI nian mais KI hanesan órgaun Estadu nian ne’ebé iha kompeténsia atu halo mediasaun, ami prontu atu halo komunikasaun ho MAPKOMS atu hato’o katak dalan ida-ne’e la’ós dalan ezemplár iha sosiedade demokrátika ninian,” Virgílio Guterres subliña.
Dalan demokrátiku ne’e, MAPKOMS tenke prova ba públiku katak, notísia faktus ne’ebé Hatutan.com hatún ne’e falsu, ne’e MAPKOMS tenke prova la’ós iha Tribunál, maibé prova ho deklarasaun, prova ho aprezentasaun direitu de resposta.
SEKOMS Laiha Komentáriu
SEKOMS, Mericio Juvinal dos Reis “Akara”. Foto/Hatutan.com
Sekretáriu Estadu Komunikasaun Sosiál (SEKOMS), Merício Juvinál dos Reis “Akara” seidauk bele fó komentáriu tanba nia parte seidauk hatene kona-bá keixa hosi MAPKOMS hasoru Xefe Redasaun no jornalista média online Hatutan.com.
“Ha’u foin rona kona-bá informasaun ne’e, ne’ebé ha’u seidauk bele fó komentáriu ruma. Ha’u presiza tempu atu akompaña atu hatene didi’ak kona-bá asuntu ne’e. Karik aban bainrua mak ha’u fó komentáriu tanba foin rona no seidauk iha hanoin ruma,” Mericio Juvinal dos Reis Akara hateten iha Parlamentu Nasionál, Tersa (24/05/2022).
TLPU Defende Servisu Jornalista
Prezidente Timor-Leste Press Union (TLPU), Cândido Maria Alves haree katak, durante ne’e seidauk iha jornalista ida mak ema ruma lori ba hatama ona iha prizaun.
Liga ho kazu Xefe Redasaun Hatutan.com ninian ne’ebé Ministériu Públiku notifika ona iha Segunda (23/05/2022) hodi ba presta deklarasaun kona-bá publikasaun informasaun sira ligadu ho projetu instalasaun Set Top Box ne’ebé keixa hosi MAPKOMS, Cândido hateten, bainhira iha jornalista ida mak halo sala, fontes bele hato’o nia direitu de resposta ba média ne’e hodi bele iha klarifikasaun no la’ós diretamente ba instituisaun judisiál sira.
Prezidente TLPU, Candido Maria Alves. Foto/Hatutan.com
“Jornalista ka média ne’e fó oportunidade ba nia, bele hato’o nia direitu de resposta. Hanesan notisia ohin ne’e tuun, aban, nia lee nia tenke ba halo klarifikasaun kedan, katak tanba sá mak notisia ne’e labele husu ba ami. Sé jornalista mak la hatun nafatin mak ita bele buka dalan legál sira hanesan ne’e,” Cândido Alves hateten ba Hatutan.Com iha Caicoli, Tersa (24/05/2022).
Maski nune’e, nia dehan se kazu ne’e iha duni ona Tribunál, husik ba, depois maka Tribunál bele tetu lia-loos, to’o iha ne’ebé. Maibé, jornalista sempre hato’o informasaun ho faktu no lia-loos.
“Tanba ne’e mak ha’u sempre hatete katak, jornalista bele halo sala, maibé, labele bosok. Ida-ne’e mak importante. Sé to’o ona tribunál, husik Tribunál mak bele buka lia-loos no ha’u nu’udár Prezidente TLPU husu ba ema hotu katak jornalista halo kooperasaun di’ak ho ema hotu. Bainhira fukun no naksalak, tenke buka-malu tuur hamutuk, katak la’ós dalan di’ak liu mak Tribunál,” Prezidente TLPU ne’e fó-hanoin.
TLPU husu ba ema hotu iha TL atu labele haree jornalista hanesan inimigu, maibé haree jornalista hanesan amigu, nune’e bele hametin relasaun di’ak ba malu hodi haburas demokrasia iha rai ne’e.
TLPU sei la nonook ho kazu ne’e no sei hamutuk ho membru tomak iha asosiasaun média sira, hodi jornalista ninia servisu ne’ebé la’o hela iha korridór lei nian.
“TLPU hamri’ik ba jornalista sira hotu, ne’ebé la’os de’it hosi asosiasaun seluk, maibé bainhira lia-loos, ita hamri’ik hamutuk, ita la’o hamutuk, hodi buka lia-loos ne’e to’o iha ne’ebé de’it,” Cândido Alves afirma.
AJTL Konsidera MAPKOMS Hahú Limita Liberdade Jornalista
Prezidente Asosiasaun Jornalista Timor-Leste (AJTL), Zevónia Vieira. Foto/Album Zevonia.
Prezidente Asosiasaun Jornalista Timor-Leste (AJTL), Zevónia Vieira konsidera notifikasaun hosi MP ba Xefe Redasaun Hatutan.com nian hatudu katak, Governu liuhosi MAPKOMS, hahú limita jornalista sira ninia liberdade hodi asesu ba informasaun.
AJTL ninia kna’ar maka promove no luta ba liberdade imprensa no expresaun iha TL. Signifika, públiku tenke fó liberdade ba jornalista sira atu halo kobertura ba asuntu investigativu ruma ho krítiku, hodi hato’o ba públiku.
“Liga ho situasaun ne’ebé mak agora Xefe Redasaun Hatutan.com hasoru, MAPKOMS hakarak lori bá Tribunál, AJTL konsidera ida-ne’e la loos. Tanba impede ona Liberdade imprensa ne’ebé mak durante ne’e ita promove, ita luta,” Zevónia Vieira hateten ba Hatutan.com via telefónika, Tersa (24/05/2022).
AJTL mós konsidera aktu hosi MAPKOMS ne’e hanesan dalan atu hata’uk servisu redasaun ka jornalista sira atu halo investigasaun ne’ebé krítiku ba kazu ruma mak komete hosi membru Governu balun ka maker ukun sira no tenta atu hamosu informasaun mak halakon boa governasaun.
“Entaun, AJTL ninia prespetiva ba servisu jornalizmu nian, katak, sé MAPKOMS lori duni jornalista ka Xefe Redasaun ba Tribunál ne’e impede ona liberdade imprensa,” Zevónia hateten tán.
AJTL haree katak, indise Liberdade imprénsa mundiál, TL hetan ranking primeiru iha Sudeste Aziátiku. Maibé, sé kazu ida ne’e akontese maka iha konstituisaun RDTL artigu 40 ho 41, ne’ebé ko’alia kona-bá promove direitu sira ba asesu informasaun nian no direitu ba jornalista sira atu halo kobertura ne’ebé mak defende ba lia-loos.
“Ida ne’e mak problema boot no triste tebes, karik governu uza ninia politika atu hanehan jornalista sira, atu hata’uk jornalista sira, atu hata’uk redasaun sira, atu fó informasaun ne’ebé loloos,” Zevónia hateten.
AJTL apresia mós ba Hatutan.com ninia servisu ne’ebé mak brani halo investigasaun kona-bá informasaun sira ne’ebé mak iha tendénsia “karik bele mosu korrupsaun ka mosu fraude” ba iha servisu ministériu nian balun.
Hatutan.com kontinua fó-sai ninia responsábilidade ho professionál, liga ho étika jornalizmu nian hodi hetan. Sé MAPKOMS hakarak dehan ida ne’e laloos, nia bele halo press conference, atu nune’e, jornalista sira bele fó mais karik, nia lori ida ne’e bá Tribunál, nia uza ona nia podér politiku atu hanehan.
Ba ida-ne’e, AJTL kontra no la aseita totál tanba hasoru Média Hatutan.com nia Xefe Redasaun. Aktu ida ne’e mós karik bele akontese mós ba jornalista ka iha média seluk.
“Espera katak, governu bele tetu didi’ak atu labele lori ida ne’e ba iha Tribunál, tanba iha kódigu sivíl. Ida ne’e sira nia intensaun, koko, atu hamate ona servisu jornalizmu nian. Ita hatene katak, média la halo servisu krime, hodi hasoru ema ida. Média nia papél maka hasai informasaun ne’ebé loos, kredível, balansu, no kritiku, hasoru situasaun sira ne’ebé maka karik iha liubá interese politiku nian,” Zevónia hateten tán.
Dala-ida tán AJTL konsidera aktu ida ne’e hatudu katak, MAPKOMS hahú taka dalan ba liberdade imprénsa no espresaun, tanba AJTL mós halo akompañamentu katak MAPKOMS hahú iha tendénsia atu lori duni Xefe Redasaun Hatutan.com ba Tribunál.
“Espera katak ida-ne’e sei la sai kazu boot ida. Sé sai kazu boot maka AJTL ho jornalista sira seluk, membru asosiasaun sira sei hamri’ik, atu halo asaun kontinua, hodi fó hanoin ba governu atu labele impede servisu jornalizmu nian ne’ebé mak tuir korridór. Ita iha kódigu étika jornalista no halo tuir dalan ne’ebé mak professionál,” Zevónia espera.
Jornalista nu’udár mós Xefe Redasaun Hatutan.com, Francisco Belo Simões da Costa, iha Segunda (23/05/2022), presta ona deklarasaun iha Ministériu Públiku (MP) ka Prokuradoria Distritál Díli, kona-bá keixa balun ne’ebé hatama hosi Francisco Martins da Costa Pereira Jerónimo, atuál Ministru Asuntu Parlamentár no Komunikasaun Sosiál (MAPKOMS).
Lee Mós: AJAR Husu CAC ho MP Sériu Investiga Projetu Set-top Box RTTL,E.P
CAC Investiga Hela Instalasaun Set-top Box RTTL, E.P Ne’ebé Nakfilak Projetu “Fahe” De’it
Iha Vila Verde, Set-top Box RTTL,E.P Rai De’it iha Sede Suku
Komunidade Becora Instala Rasik Set-top Box RTTL,E.P
Komunidade Guisu Liquisa Konsidera Projetu Set-top Box RTTL,E.P “Laiha Benefísiu”
Projetu Set-top Box RTTL,E.P, PM Taur Enkoraja Sidadaun Sira Lori ba CAC
MAPKOMS Halo Ona Pagamentu 90% Ba Projetu Set-top Box RTTL,E.P
Kazu Projetu Set-top Box RTTL,E.P, LABEH husu CAC ho MP Aselera Investigasaun
CAC Submete Ona Kazu Projetu Set top Box RTTL,E P Bá Ministériu Públiku
Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P
JSMP Husu MP Nakloke Ba Públiku Kona-bá Kazu Set-top Box RTTL,E.P
Akadémiku Husu MP Labele “Budu” Kazu Set-top Box RTTL,E.P
HAK Sujere Ba PDHJ Atu Ajuda MP Aselera Kazu Set-top Box RTTL,E.P
MP Delega Ona Kompeténsia Ba CAC atu Arrola Sasín ba Kazu Set-top Box RTTL,E.P
Kazu Projetu Set-top Box RTTL,E.P, CAC Bolu Ona Sasin Husi MAPKOMS ho RTTL
Prezidente RTTL,E.P La Fó Komentáriu Ba Projetu Instalasaun Set-top Box RTTL,E.P.
Kazu projetu instalasaun set-top Box/ Prezidente RTTL,E.P presta deklarasaun iha CAC
Projetu Instalasaun Set-top Box RTTL,E.P, CAC Bolu Ona Sasin Na’in-Ualu
Projetu Instalasaun Set-top Box RTTL,E.P Iha Ona Faze Verifikasaun Objetu Krime
MAPKOMS La Fó Komentáriu Kona-bá Kazu Projetu Instalasaun Set-top Box RTTL,E.P
MAPKOMS Halo Keixa “Denúncia caluniosa” Hasoru Xefe Redasaun Hatutan.com
Jornalista: Vito Salvadór/Rogério Pereira Cárceres
Justisa & Krime
Tauk Povu Lakon Konfiansa Ba Tribunál, Komisaun La Públika Valór Ezame Kandidatu Juízes
Hatutan.com (15 Outubro 2026), Díli – Membru Komisaun Rekrutamentu Juiz ba Tribunál Supremu Justisa (TSJ), Carmelita Caetano Moniz hatete, Kandidatu ne’ebé hetan valór ne’ebé to’o ba kritériu aprova sei hetan estatutu aptu, enkuantu sira ne’ebé la atinji valór ne’ebé determina sei konsidera la aptu, kandidatu sira ne’ebé la aptu iha direitu atu hato’o reklamasaun, no juri sei analiza reklamasaun hirak-ne’e antes foti desizaun.
Tuir Carmelita, servisu juis nian iha responsabilidade bo’ot iha sosiedade, tanba desizaun judisiál sira afeta diretamente direitu no moris sidadaun sira. Tanba ne’e, nia konsidera katak avaliasaun ba juis tenke hala’o ho kuidadu no tuir kritériu ne’ebé klaru.
“Valór ita labele tau, tanba sé juíz ida hetan valór ida ki’ik tebes, konfiansa povu nian ba tribunál oinsá? impaktu sosiál makas tanba ho ida ne’e mak juíz sira nia servisu la hanesan ita bai-bain. Juíz nia servisu ne’e servisu ida ne’ebé ita dehan depois de Maromak, segundu maromak iha mundu mak juíz sira ona, ema hotu-hotu tenki kumpri, sira haruka ba prizaun tenki ba, entaun ita tenki rezerva tebes sasan sira ne’e,” Dehan Membru Komisaun Rekrutamentu Juiz ba Tribunál Supremu Justisa (TSJ), Komisária Carmelita Caetano Moniz, iha Palásiu Governu, Kinta 15/10/2026.
Nia mós rejeita kona-ba diskriminasaun iha prosesu avaliasaun, nia afirma katak membru juri na’in tolu no sekretáriu ida mai husi Portugal, no sira la koñese kandidatu sira ne’ebé partisipa iha prosesu rekrutamentu.
“Primeiru la iha diskriminasaun ba valór tanba juri na’in 3 ho sira nia sekretáriu ida mai hotu husi ne’eba (Portugal) sira nein koñese kandidatu ida, ne’ebé ita atu ko’alia deskriminasaun husi ida ne’ebé? Afasta sira ne’e tanba valór la to’o, tuir regulamentu avaliasaun ne’ebé mak komisaun aprova katak ezame eskrita ne’e sira ne’ebé iha valór masimu di’ak liu ne’e mak 20,” Nia informa
Avaliasaun ba ezame eskrita hala’o tuir regulamentu ne’ebé komisaun aprova ona. Tuir nia, kandidatu ne’ebé hetan valór máximu 20 mak konsidera aptu ka pasa, enkuantu kandidatu ne’ebé hetan valór menus husi 10 la pasa.
Nia mós kompara sistema ne’e ho avaliasaun karreira iha instituisaun judisiál no Ministériu Públiku, ne’ebé uza kategoria kualifikadu no la kualifikadu. Nia konsidera katak publikasaun valór individual ba juis bele iha impaktu ba konfiansa públiku ba tribunál.
Vaga ne’ebé disponivel limitadu kompara ho númeru kandidatu sira, kandidatu na’in 32 kompete ba vaga ne’en (6) iha Tribunál Supremu Justisa, enkuantu kandidatu na’in 24 seluk kompete ba vaga sia iha Tribunál Rekursu.
Nia aumenta, kandidatu sira ne’ebé la hetan vaga iha faze ida bele hein oportunidade seluk atu partisipa iha prosesu seleksaun ba Tribunál Rekursu ka Tribunál Supremu Justisa, tuir vaga no kondisaun ne’ebé disponivel.
“Kandidatu sira ne’ebé la pasa iha prosesu seleksaun ba tribunál superior sira sei kontinua hala’o sira-nia funsaun nu’udar juis iha primeira instánsia, no bele partisipa fali iha konkorsu tuir regra no oportunidade ne’ebé disponivel,” Nia salienta.
Iha parte seluk, komisáriu José Pedro Camões, esplika, avaliasaun ba kandidatu sira hala’o tuir kritériu ne’ebé komisaun determina ona, ho rezultadu aptu no la aptu. Kandidatu sira ne’ebé la konkorda ho rezultadu avaliasaun bele uza sira-nia direitu atu hato’o reklamasaun.
“Ezame ne’e iha maneira rua atu fó valór tau aptu no la aptu, ida valór sufisiente ba leten mak aptu no ida númeru eskala ki’ik ne’e mak la aptu ne’ebé la’os buat foun ida, labele deskonfia, bai-bain dehan valór iha 6 ba leten ne’e valór ida di’ak, karik valór 5 mai kraik ne’e valór ida ladun di’ak, ne’ebé maneira atu avalia ne’e mak ida ne’e, se la aptu, sira bele uza sira nia direitu atu halo reklamasaun, depois juri sira sei hare’e sira nia reklamasaun ne’e atu fó fali desizaun seluk,” Esplika Membru Komisaun Rekrutamentu Juiz ba Tribunál Supremu Justisa (TSJ), José Pedro Camões.
Desizaun kona-ba prosesu avaliasaun no rekrutamentu juis nian tama iha kompeténsia Konsellu Superior Majistratura Judisiál, tuir lei no regulamentu ne’ebé vigora.
Jornalista: Maria Angelita Sandi Belo
Hatutan.com (15 Outubru 2026), Díli – Komisaun Anti-Korrupsaun (CAC) hala’o atividade sensibilizasaun no formasaun ba membru Polísia Nasionál Timor-Leste (PNTL), iha Sentru Formasaun Polísia, Comoro, Díli, ho objetivu atu hametin kooperasaun entre instituisaun rua ne’e, iha esforsu prevensaun no kombate krime komún no korupsaun iha Timor-Leste.
Komisáriu Adjuntu ba Prevensaun no Sensibilizasaun CAC, Rosario Salsinha Araújo, hatete, formasaun ne’e importante atu hametin kooperasaun entre CAC no PNTL, liu-liu iha komprensaun kona-ba krime no korupsaun, no oinsá atu hadi’a sistema servisu polísia nian.
“Formasaun ida ne’e atu aproxima tan Polísia, liu-liu komandante sira, atu bele komprende oinsá servisu sira liga ho asuntu kriminál no korupsaun. Ita hare’e mós oinsá atu hadi’a sistema servisu polísia nian, tanba nasaun enfrenta problema oi-oin ne’ebé polísia tenke hasoru, iha servisu balun ne’ebé liga ho korupsaun no balun seluk liga ho krime komún. Tanba ne’e, presiza kooperasaun no vontade tomak atu prevene no kombate krime sira ne’e,” dehan Komisáriu Adjuntu ba Prevensaun no Sensibilizasaun CAC, Rosario Salsinha Araújo ba jornalista sira iha Akademia Polísia, Comoro, Kinta-feira (15/10/2026).
Nia mós subliña katak PNTL iha responsabilidade importante atu mantein fiar públiku, tanba komunidade konsidera polísia hanesan instituisaun ne’ebé iha kna’ar atu garante seguransa no kumprimentu lei.
Tanba ne’e, nia apela atu membru PNTL hotu-hotu evita hahalok koruptu no komprende di’ak lei penál sira ne’ebé liga ho krime korupsaun.
“Ita tenke fó hanoin ba ema hotu, liu-liu instituisaun PNTL ne’ebé povu fiar, atu labele iha tendénsia komete aktu korupsaun. Instituisaun PNTL, ho nia estrutura tomak, tenke hola parte, koopera no komprende asuntu sira lei penál nian ne’ebé liga ho korupsaun,” nia hatutan.
Iha parte seluk, Segundu Komandante Institutu Superior Sentru Polísia, Superintendente Xefe, Joni Viana, hatete formasaun ne’e importante tanba iha relasaun ho Lei Nú. 17/2020 kona-ba medida prevensaun no kombate korupsaun.
Nia esplika, hanesan ajente seguransa no parte husi aparellu Estadu, membru PNTL presiza iha koñesimentu sufisiente kona-ba lei sira ne’e, atu hala’o kna’ar no misaun iha terrenu tuir prosedimentu no padraun ne’ebé lo’os.
“Formasaun ida ne’e importante tebes tanba liga ho Lei Nú. 17/2020 kona-ba medida prevensaun no kombate korupsaun, hanesan ajente seguransa no parte husi aparellu Estadu, PNTL tenke iha koñesimentu kona-ba lei sira ne’e, atu iha ezekusaun no misaun iha terrenu labele sala, maibé tenke tuir padraun ne’ebé loos,” Joni Viana afirma.
Atividade sensibilizasaun no formasaun ne’e sai hanesan parte husi esforsu atu hasa’e koñesimentu membru PNTL kona-ba prevensaun korupsaun, kumprimentu lei no hadi’a kualidade servisu polísia nian iha Timor-Leste.
Jornalista: Felix Fernandes
Justisa & Krime
PM Xanana Husu Juri Halo Avaliasaun ho Di’ak Atu Hetan Juízes Kualifikadu ba Supremu Tribunál Justisa
Hatutan.com (15 Outubro 2026), Díli– Primeiru-Ministru Kay Rala Xanana Gusmão husu ba membru juri internasionál sira atu hala’o prosesu avaliasaun ba kandidatu juízes sira ho di’ak, independente no imparsiál, hodi asegura katak kandidatu sira ne’ebé sei tuur iha Supremu Tribunál Justisa (STJ) iha kualifikasaun no kapasidade adekuada.
Pedidu ne’e Primeiru-Ministru hato’o durante enkontru ho membru juri internasionál sira, ne’ebé responsavel ba prosesu seleksaun juízes, hafoin prosesu teste eskrita remata ona no prepara atu tama ba faze entrevista.
Iha enkontru ne’e, Xanana apresia servisu ne’ebé juri sira hala’o to’o agora, no husu atu kontinua hala’o knaar ho responsabilidade, tuir padraun no espetativa Estadu nian.
“Enkontru ida ne’e atu fó esperansa ba malu, Primeiru-Ministru hakarak juri sira halo servisu ho di’ak tuir prespetiva ne’ebé mak ita no estadu nia hakarak,” Dehan, membru Komisaun rekrutamentu Juiz STJ, Komisária Carmelita Caetano Moniz, iha Palásiu Governu, Kinta, 15/10/2026.
Primeiru Ministru konfia tebes juri sira nia integridade, imparsialidade, independensia no juri sira nian esperiensia ne’ebé mak bo’ot tebes.
Primeiru-Ministru mós hato’o konfiansa ba integridade, imparsiálidade, independénsia no esperiénsia profisionál membru juri sira nian. Nia subliña katak avaliasaun ne’ebé hala’o ho di’ak sei ajuda identifika kandidatu Timoroan sira ne’ebé iha kualifikasaun atu hala’o knaar nu’udar juízes iha Supremu Tribunál Justisa.
“Primeiru Ministru konfia tebes juri sira nia integridade, imparsialidade, independensia no juri sira nian esperiensia ne’ebé mak bo’ot tebes. Tanba ne’e Primeiru-Ministru husu atu ho kapasidade ne’ebé juri sira iha atu halo avaliasaun teste ida ne’ebé di’ak hodi hetan ita nia Timor oan sira ne’ebé kualifikadu hodi ba tu’ur iha Supremu Tribunál Justisa, ida ne’e mak PM husu tanba hakarak hari’i Supremu Tribunál Justisa ho juízes sira ne’ebé mak kualifikadu no juri sira mós komprometidu katak sei halo servisu ida ne’ebé mak di’ak ba rai ida ne’e,” Informa Komisária Carmelita.
Juri sira mós lori sira nia naran no instituisaun ne’ebé sira servisu antigamente dehan sira sei halo forma hotu-hotu ho di’ak atu hetan rezultadu ne’ebé di’ak.
Jornalista: Maria Angelita Sandi Belo
Komemorasaun Loron Mundial Ai-han 2026: Inovasaun Tenke Serve ba Nutrisaun, Povu no Planeta, la’ós de’it ba lukru
20 Outubru-ne’e, Tribunál Díli realiza julgamentu ba argiudu sira iha kazu Set-Top Box RTTL, E.P
Tauk Povu Lakon Konfiansa Ba Tribunál, Komisaun La Públika Valór Ezame Kandidatu Juízes
CAC Halo Sensibilizasaun ba PNTL Atu Prevene no Kombate Krime, Korupsaun Iha Timor-Leste
PM Xanana Husu Juri Halo Avaliasaun ho Di’ak Atu Hetan Juízes Kualifikadu ba Supremu Tribunál Justisa
DIT Hahú Introdús ba Estudante Sira Kona bá Seguransa ba Dadus Importante
IGJ Legaliza Corais Timor bá Atividade Futu-Manu
STOP PRESS: Ministru Nino Pereira Konsumu Dose Kontamina ho Frasku Halo Nanál Kanek no Ran
Indonesia dan Timor-Leste Perkuat Kerjasama Ekonomi, Sosial Budaya, dan Pariwisata
Governu Indika BTK Hadi’a Trotoár Naksobu iha Área Bebora
Asesu Gratuita HATUTAN.com
Hafoin Ferias Judisiáriu PGR Sei Ko’alia Kazu Set-top Box RTTL,E.P
Xefe Estadu TL Kondekora Militár Korea Súl Ne’ebé Mate iha Oé-Cusse
PCIC Detein MG Lori Osan Falsu Hosi Inglaterra
PR Simu Karta Kredensial Husi Embaixadór Brunei Darussalam ho Reinu España
-
Polítika1 week agoIha informasaun, Xanana sei “tula-liman” ba Ramos-Horta rekandidata ba PR 2027-2032
-
Saúde1 week agoINCSIDA halo sensibilizasaun kona-bá prevensaun HIV-SIDA ba estudante na’in-300
-
Defeza & Seguransa1 week agoKustu projetu kuartél jerál PNTL aumentu ba millaun US$12
-
Nasionál1 week agoKandidatu traballadór Timor-oan 90.000 ho estatutu iha sistema standby atu ba Austrália
-
Defeza & Seguransa1 week agoKandidatu kadete PNTL hahú prova kultural iha Komisaun Funsaun Publika
-
Justisa & Krime1 week agoTribunál fó dame membru F-FDTL ida ho ofendidu na’in-rua ba kazu krime ofensa integridade fizika
-
Indonesia1 week agoTNI asegura kombustivel tonelada rua atu hatama illegal mai Timor-Leste
-
Ekonomia1 week agoMCI finaliza estudu viabilidade kona-bá konstrusaun merkadu iha munisípiu haat