Hatutan.com, (03 Juñu 2022), Díli- Estadus Unidus Amerika (EUA) no Timor Leste sei asina akordu Millennium Challenge Corporation  (MCC) iha Programa Compact hodi tulun hakbiit setór Edukasaun, bee-moos no saneamentu iha Timor-Leste.

Lee Mós : USAID Lansa Atividade Haforsa Governasaun Komérsiu TL ho Millaun $10,2

Enkarregadu Negósiu Embaixada EUA, Tom Daley. Foto/Hatutan.com

Iha programa Compact ne’e rasik  EUA sei tau osan maizumenus millaun $420 no akordu MCC rasik sei asina entre nasaun rua iha tinan ne’e molok tama bá faze implementasaun.

Enkarregadu Negósiu Embaixada EUA, Tom Daley hafoin hasoru malu ho Prezidente Repúblika (PR) iha Palásiu Prezidensiál, Díli, Sesta, (03/06/2022), relata katak sira-nia parte ko’alia kooperasaun iha área oioin, maibé foka liu kona-bá dezenvolvimentu polítika no ekonomia Timor-Leste nian.

 “Ami iha kooperasaun iha nivel oin-oin no ha’u hakarak fó sai bá ita-boot sira katak lakleur tan sei iha asinatura akordu Millennium Challenge Corporation  (MCC) ho Governu Timor-Leste iha programa Compact no EUA komprometidu atu tau fundu  millaun $420 hodi apoiu Timor-Leste iha setór edukasaun, bee-moos no saneamentu,” Tom Daley hateten.

Iha enkontru ho Prezidente Repúblika, José Ramos-Horta ne’e, ko’alia mós posibilidade kooperasaun sira ne’ebé iha no komemorasaun tinan 20 relasaun bilateral entre Timor-Leste ho EUA.

Iha fatin hanesan Diretora Misaun USAID ba Timor Leste, Zema Semunegus hateten, USAID iha Timor Leste dezde 2001 no hahú iha tinan ne’ebá USAID fó ona apoiu liu millaun $350 bá ajuda dezenvolvimentu Timor-Leste nian.

“Ami foka bá programa rua iha Timor-Leste; ida mak kona-bá kreximentu ekonomia ka diversifikasaun ekonómika no ida seluk mak kona-bá programa Governasaun iha ne’ebé liu husi programa Governasaun ne’e ami apoia sistema hametin Governu,” Zema Semunegus hateten.

Iha USAID nia programa diversifikasaun ekonomia ka  kreximentu ekonómika foin halo lansamentu no atividade ne’e tinan tolu nian atu apoiu Autoridade Aduaneira sira hadi’a di’ak liután sira-nia servisu no mós hafasil ema rai-li’ur hatama sasán mai Timor-Leste atu atividade sira Aduaneira nian sai transparente liután.

Jornalista: Vito Salvador