Hatutan.com, (17 Juñu 2022), Díli- Uniaun Defisiénsia Matan Timor Leste (UDMTL), Sesta (17/06/2022), hasoru malu ho Prezidente Repúblika (PR), José Manuel Ramos-Horta, hodi husu apoiu no paresér husi PR Horta kona-bá situasaun UDMTL nian.

Lee Mós : Estadu Presiza Aselera Ratifikasaun Konvensaun Internasionál Direitu Bá Ema ho Defisiénsia

Uniaun Defisiénsia Matan Timor Leste (UDMTL), Sesta (17/06/2022), hasoru malu ho Prezidente Repúblika (PR), José Manuel Ramos-Horta. Foto/Hatutan.com

Diretór Ezekutivu UDMTL, Jacinto Pereira, hateten sorumutuk ho Prezidente Repúblika (PR) atu informa kona-bá situasaun real organizasaun nian hodi husu Xefe Estadu nia paresér atu tulun UDMTL liuliu bá prosesu apoiu sira husi Governu liu husi Ministériu Solidariedade Sosiál no Inkluzaun (MSSI) bá organizasaun defisiénsia matan.

Nia afirma asuntu kona-bá subsídiu UDMTL mós husu bá Prezidente Repúblika atu halo paresér ruma bá Governu liuliu Ministériu Edukasaun (ME) hodi bele estabelese eskola sekundária bá ensinu rekorrente atu bele asesu.

“Ami mai husu Xefe Estadu nia paresér atu tulun UDMTL no maluk ho defisiente sira bele asesu bá subsídiu husi Governu liu husi MSSI no buat ne’ebé importante liu mak ami hakarak Xefe Estadu ko’alia ho Governu estabelese ensinu rekorrente ne’e too iha nivel sekundáriu,” Diretór Ezekutivu UDMTL, Jacinto Pereira haktuir.

UDMTL mai hato’o preokupasaun hirak ne’e bá Xefe Estadu tamba daudaun ne’e ME liu husi departamentu ensinu rekorrente foin estabelese to’o de’it iha  Pre-Sekundáriu tanba ne’e maka maluk ho Defisiénsia  sira remata iha Pre-Sekundáriu sira labele kontinua Sekundáriu  tanba seidauk iha Eskola Sekundáriu, tanba ne’e maka ohin UDMTL hakarak husu  Xefe Estadu atu haree ba ida-ne’e.

Tuir dadus sensu uma-kain tinan 20215 númeru ema ho defisiénsia atinje 38.128 no tuir relatóriu demography health survey númeru ema ho defisiénsia atinje 50.000 no husi ne’e ema ho defisiénsia matan hamutuk 14.118.

Jornalista: Vito Salvador