Hatutan.com, (23 Juñu 2022), Díli-Diretór Diresaun Administrasaun no Finansas (DAF) iha Ospitál Nasionál Guido Valadares (HNGV), Raúl Humberto Gama, informa durante fulan-Maiu nia laran, HNGV rekolla reseita hamutuk rihun $32 hosi pasiente sira.

Lee Mós : Formandu Na’in-114 Konklui Formasaun Lian Inglés iha HNGV

Diretór Diresaun Administrasaun no Finansas (DAF) HNGV, Raúl Humberto Gama. Foto/Hatutan.com

Reseita orsamentu hirak ne’e, rekolla hosi pasiente sira ne’ebé mak bá trata sira nia dokumentu atestadu médiku, hasai X-Ray, inklui dokumentu importante sira seluk tán iha HNGV, Bidau, Díli.

“Kona-bá reseita ne’ebé mak ami hala’o kobransa, durante fulan-Maiu nia laran, ninia montante ne’e, totál rihun $32. Ida ne’e akumulativu hosi atestadu médiku ho seluk tán,” Raúl Humberto Gama, hateten, ba jornalista sira, hafoin serimónia entrega sertifikadu bá formandu sira iha Salaun enkontru HNGV, Bidau, Dili, Kinta (23/06/2022).

Dadus ne’ebé detallu liu hosi reseita sira ne’ebé parte HNGV rekolla, balu seidauk tama, tanba Ospitál Nasionál mai hosi fonte ne’ebé diferente, la’ós iha fatin ida de’it, maibé iha fatin ne’ebé mak tenke relata mós relatóriu kada fulan bá diresaun administrasaun no finansas nian.

Espasu Iha HNGV Hahú “Kloot”

Diretór Raúl Humberto Gama rekoñese katak, oras ne’e daudaun, espasu HNGV hahú “kloot” bá daudaun, tanba númeru pasiente sempre aumenta. Governu liuhosi Ministériu Saúde, aprezenta ona planu mestre bá dezeñu konstrusaun HNGV nian, maibé planu ida-ne’e depende mós bá Governu nia desizaun, atu bainhira mak implementa.

Kona-bá kondisaun bá sala ICU ne’ebé ki’ik presiza muda fali ba fatin foun ne’ebé mak daudaun ne’e konstrui hela kompañia balu. Maibé, to’o agora obra ne’e rasik seidauk entrega hosi kompañia, tanba prosesu  sira kona-bá halo aprovizionamentu ne’e, MS mak responsabiliza.

Lee Mós : Ema Na’in-Ualu Mate ho Dengue iha Hospitál HNGV

Jornalista: Rogério Pereira Cárceres