Hatutan.com, (07 Jullu 2022), Díli- Prezidente Repúblika (PR), José Ramos-Horta ho Primeiru-Ministru (PM), Taur Matan Ruak, preokupa no la kontente  ho atuasaun Guarda Munisipál Díli hasoru vendedór ambulante sira iha estrada ibun iha Díli, foin lalais ne’e.

Prezidente Repúblika (PR), José Ramos-Horta ho Primeiru-Ministru (PM), Taur Matan Ruak. Foto/Hatutan.com

Prezidente Repúblika ho Primeiru-Ministru konsidera asaun ne’ebé pesoál Saneamentu Munisípiu Díli halo hasoru vendedór ambulante sira ne’ebé nia vídeo viral iha media sosiál Facebook sira  la umanidade.

Hafoin hasoru malu ho Prezidente Repúblika iha Palásiu Prezidensiál, Díli, Kinta (07/07/2022), Primeiru-Mnistru, Taur Matan Ruak, hateten iha tempu kotuk bainhira Prezidente Autoridade Munisípiu Díli simu posse kestaun ida ne’ebé Governu ko’alia mak oinsá kontrolla sidadaun sira ne’ebé faan sasán iha sidade Díli atu nafatin mantein tau konsiderasaun bá ordem públiku no lao tuir nafatin korudor lei sira ne’ebé vigora.

Nia afirma bainhira negosiante ambulante sira halo sira nia aktividade negosiu  iha fatin sira ne’ebé la intererope movimentu sidadaun sira nian labele book sira no karik book tenke negosia ho sira, esplika bá sira tanba saida mak lori sai, tanba saida mak husu bá muda, maibé labele agresivu demais.

Advertisement

“Ha’u lamenta situasaun ida-ne’e, maibé ha’u mós husu bá ita-nia vendedór sira atu labele faan fali iha estrada klaran,” Taur Matan Ruak hateten.

Xefe Governu ne’e hatutan, imajina bainhira kondutór ida hemu tua barak iha fatin ruma hanesan iha bar sira iha Kristu Rei ne’eba lori karreta tesik bá sama sira ruma, sira ruma mate imi dehan halo nusa?, Governu la hatene jere? Entaun ikus mai Governu mak sala de’it sidadaun nunka sala. Tanba ne’e, Taur Matan Ruak, husu kompriensaun atu populasaun sira disiplina uituan, iha uma mós tenke fó disiplina bá oan sira, entaun iha sidade mós tenke impoin disiplina, iha fatin balun ne’ebé bele faan, maibé fatin balun ne’ebé sira labele fa’an.

 “Ha’u lamenta no horisehik Ministru Estatal mós informa ona ha’u kona-bá ida ne’e no ha’u husu mós kompriendesaun populasaun sira nian,”  Taur Matan Ruak tenik.

Liuhusi publikasaun notísia TVE, edisaun Kuarta (06/07/2022), Prezidente Repúblika (PR), José Ramos-Horta, hato’o nia preokupasaun no lamenta tebetebes atuasaun guarda Saneamentu Munisípiu Díli nian ne’ebé duni sai vendedór ambulante sira to’o uza forsa halo rahun vendedór sira-nia sasán.

Jornalista : Vito Salvador 

Advertisement