Hatutan.com, (13 Jullu 2022), Díli— Ministru Justisa (MJ) Tiago Amaral Sarmento sei halo esforsu hotu nune’e Defensoria Publiku (DP) bele hetan ninia estatutu nu’udár instituisaun autónomu Finanseiru, no la tutela ba Ministériu Justisa ne’ebé hatodan orsamentu Ministériu Justisa nian.

Ministru Justisa (MJ) Tiago Amaral Sarmento hala’o vizita ba edifisiu Defensoria Publiku. Foto/Média MJ.

“Ha’u komunika ona ho bankada opozisaun no bankada Governu no sira pronto atu halo alterasaun ba Estatutu Defensoria Publiku, nune’e DP ne’e bele sai instituisaun autonomu Finanseiru, Patrimóniu Administrativu,” Hatutan.com sita lia-fuan Ministru Justisa iha Komunikadu, ne’ebé informa ba dirijentes sira iha reuniaun Konsellu Konsultivu Ministériu Justisa nian iha kafetaria Ministériu Justisa nian, Kuarta (13/07/2022).

Lee Mós:MJ Kobre Reseita Millaun $2.1 Husi Arrendatariu Rai no Uma Estadu

Tiago Sarmento esplika mós razaun halo esforsu atu Defensoria Publiku bele sai Institusaun autonomu ida tanba Lei Organizasaun Judisiária Tama ona Vigór ne’e ejize buat barak ona.

“Tribunál, Juiz, Prokuradór no Defensór publiku sira, agira DP mós ita tenke tau autonomu, nune’e nia bele book an ho lais oinsa CAC ho PCIC ne’ebé la temi iha Konstituisaun RDTL nia bele autonomu no DP labele,” nia haktuir.

Razaun daruak maka, DP ne’e ninia natireza loloos autonomu nanis kedan tuir K-RDTL maibé tanba Governu foin hahú iha tempu ne’ebá ne’e mak halo nune’e DP iha MJ nia okos.

Ida ne’e halo orsamentu kada tinan ba Diresaun Jerál Serbisu Notariadu, Diresaun Jerál Terras no Propriedade inklui Departementu sira seluk menus tebes.

Ministru Justisa husu ba Diresaun Nasional Assesoria Juridika no Lejizlasaun (DNAJL), Nelinho Vital atu bele aselera lalais Estatutu Defensoria Publiku nian.

Antes ne’e, loron 9 fulan Juñu, Ministru Justisa Tiago Amaral Sarmento halo ona vizita ba iha edifisiu Defensoria Publiku iha Balide, hodi reuniaun ho Defensór sira no haree kondisaun edifisiu nian.

Jornalista: Carmelita Isaac