Hatutan.com, (18 Agostu 2022), Díli- Lider Karizmátiku, Kay Rala Xanana Gusmão, sei  hasoru Papa Francisco iha Roma hodi ko’alia asuntu Dokumentu Fraternidade Umana.

Lee Mós : Timoroan hotu iha Responsabilidade Konsolida Fraternidade Umana

PR Ramos-Horta delega Lider Karizmátiku, Kay Rala Xanana Gusmão hodi reprezenta Estadu hasoru malu ho Papa Francisco iha Roma. Foto/Hatutan.com

Ajenda prinsipál Xanana nian iha Roma reprezenta    Prezidente Repúblika (PR), José Ramos-Horta iha serimónia investidura Dom Virgílio do Carmo da Silva, SDB hanesan Kardeál.

Prezidente Repúblika nomeia Xanana atu reprezentate Estadu Timor-Leste iha Vatikanu, bainhira Dom Virgílio do Carmo da Silva, SDB simu posse bá Kardeál, ne’eduni liuhosi enkontru Ramos-Horta ho Xanana iha Palásiu Prezidensiál, Kinta (18/08/2022), ko’alia kona-bá asuntu  ida-ne’e no simu briefing ruma hosi Xefe Estadu molok bá Ramos.

Xanana hateten, bainhira hasoru malu ho Papa Francisco, sei hato’o mós sentidu agradesimentu bá Papa Francisco, tanba konsidera Timor-Leste nia Arsebispu ida atu sai mós Kardiál no ida ne’e atu foti mós Timor nia naran no imajen iha mundu.

“Iha Roma enkontru ho Amu Papa, tanba ne’e ha’u la bá ho ha’u nia naran rasik, maibé hanesan reprezentate Xefe Estadu no estadu Timor Leste hodi agradese bá Papa ne’ebé hili ona Arsebispu Virgílio do Carmo da Silva nu’udár Kardeál primeiru Timor nian,” Kay Rala Xanana Gusmão hateten.

Lider Karismatiku ne’e hatutan Iha Roma sei ko’alia ho amu Papa Francisco kona-ba dokumentu fraternidade umana, tanba dokumentu ne’e, buat ida boot tebetebes. Tanba fraternidade umana ne’e ko’alia kona-bá unidade nasionál no rekonsiliasaun no iha Timor Leste rasik, hahú ona konsolidasaun bá fraternidade umana liuhosi inisiativa Prezidente Repúblika nian no iha rai laran rasik rekonsiliasaun bá Fraternidade Umana akumula konfisoins relijiozu sira ne’ebé eziste iha Timor Leste hanesan Katóliku, Protestante, Musulmanu, Budista no Konghucu.

“Xefe Estadu mós fó hatene bá ha’u, atu ha’u aprejenta bá Amu Papa katak iha Timor Leste laiha problema entre relijiaun no Timor-Leste hahú promove no konsolida fraternidade umana,” Xanana hateten.

Xanana hateten, dala ruma espetativa públiku nian hakarak hala’o buat ida boot tebe-tebes, maibé tenke hahú ho nei-neik, no importante liu atu kada tinan Timor Leste tenke iha atividade hodi konsolida fraternidade umana atu fraternidade umana sai di’ak liután.

Vise Prezidente Vatikanu nian sei mai Timor, no dala ruma sei hasoru Xefe Estadu hodi ko’alia kona-ba dokumentu fraternidade umana hodi hametin unidade no fraternidade.

Jornalista: Vito Salvadór