Hatutan.com, (24 Agostu 2022), Díli—Komunidade uma-ka’in 104, iha Kampung Baru, Aldeia Ailok Laran, Suku Hera, Postu Administrativu Cristo Rei ne’ebé antes ne’e sai mós vítima ba dezastre naturál ka bee-sa’e iha 04 abríl 2021, oras-ne’e kontinua ezíje ba Governu atu harii bairru foun ba sira, tanba sira ninia uma korrente mota sobu totál.

Komunidade uma-ka’in 104, iha Kampung Baru, Aldeia Ailok Laran, Suku Hera, Postu Administrativu Cristo Rei ne’ebé antes ne’e sai mós vítima ba dezastre naturál ka bee-sa’e iha 04 abríl 2021, oras-ne’e kontinua ezíje ba Governu atu harii bairru foun ba sira, tanba sira ninia uma korrente mota sobu totál. Foto/Hatutan.com.

Ezijénsia ne’e vítima sira hato’o tanba, antes parte Governu rasik, liuhosi Sekretária Estadu Protesaun Sívil (SEPS), promete ba sira katak, governu sei buka solusaun hodi rezolve sira ninia problema, liuhosi fó apoia rekuperasaun, liu-liu halo tán promesa katak sei harii bairru foun ba vítima sira-ne’e.

Lee Mós: Governu Sei Apoia Vítima Inundasaun

Iha apoiu rekuperasaun ne’e, SEPS sei distrui material sira konstrusaun nian hanesan, kalén, besi, prégu nomós sasán sira seluk tán, inklui osan, tuir nível estragu.

“Governu promete mai ami katak, atu halo bairru foun. Tanba ne’e ami husu tenke asegura hela fatin foun harii duni uma adekuadu ba ami,” Portavós vitíma afetadu, Apolónia Pires Pereira, hateten liuhosi konferénsia imprénsa iha Kampung Alor, Aldeia Ailok Laran, Suku Hera, Postu Administrativu Cristo Rei, Munisipiu Dili, Kuarta (24/08/2022).

Iha 2021, TL hasoru krize boot rua ne’ebé afeta ba populasaun tomak ninia moris, hanesan problema globál Surtu Covid-19 no problema inundasaun iha 04 abril 2021, akontese udan boot kuaze oras ualu nia laran.

Udan boot ne’e rezulta komunidade sira nia uma hetan estragus totál ho totál uma-ka’in 104 iha área Hera, lakon buat barak, hanesan uma hela fatin inklui  komunidade na’in-tolu mak lakon vida, tanba mota lori no sira nia isin seidauk hetan to’o agora.

Ho inundasaun ne’e, Governu liuhosi SEPS tun direta halo kedan intervensaun, hodi transporta urjentemente familia vítima sira ba iha fatin temporáriu sira ne’ebé mak konsidera hanesan seguru ba sira.

Hafoin inundasaun iha 04 abríl 2021 ne’e, família vítima sira balun evakua ba hela iha Canossiana Hera no balun hela iha Igreja Parókia São Santiágo nian.

Maibé iha 14 Agostu 2021, SEPS transfere fali vítima sira ba hela iha Kapela Bedik, no iha (18/07/2021) eskola Ensinu Bázika Sentrál (EBC-Sigla Português) númeru 04, iha Akanunu.

“Iha 15 de novembru 2021, Protesaun Sívil muda fila-fali ami hosi kapela Bedik, ba hela iha uma Sentru Haburas Foundation, no to’o agora, reprezentante Governu la tau matan mai ami. Ami komunidade balun, to’o agora hela iha SMP4 Akanunu, no agora mós diretór eskola husu ba ami atu hamamuk ona fatin ne’e, maibé, ami laiha hela fatin alternativa ruma,” Reprezentante vítima sira ba inundasaun nian ne’e preokupa.

Iha 16 juñu 2022, Governu liuhosi Ministériu Solidariedade Sosiál no Inkluzaun (MSSI), fó ona tulun umanitária ba vítima sira.

Maibé, parte família vítima sira mós sente sei dúvida nafatin ho apoiu ida ne’e, tanba antes mós Governu kompromete katak, sei fó apoiu material konstrusaun no ajuda osan hodi hadi’a hikas sira ninia uma ne’ebé mak estragus hosi inundasaun.

“Maibé, ajuda ne’e rasik, lori dúvidas boot mai ami, tanba laiha governu nia reprezentante ida atu mai esplika objetivu hosi tulun hirak ne’e. Ami mós hakarak husu klarifikasaun ba governu katak, komunidade afetadu balun naran laiha lista simu ajudus nian no ami balun naran iha lísta, maibé ami lakohi simu ajudus ne’e tanba laiha tán ona rai atu ba hela,” Apolónia Pereira hateten.

Família vítima sira husu ba governu atu aselera implementasaun planu harii bairru foun ba sira, tanba oras ne’e besik ona tempu udan monu rai.

Jornalista: Rogério Pereira Cárceres