Hatutan.com, (31 Agostu 2022), Díli-Policia Ciêntífica e de Investigação Criminal (PCIC) simu ona rezultadu autópsia bá mate-isin Padre Abito José Brites Casimiro hosi Ospitál Nasionál Guido Valadáres (HNGV) no submete  ona ba Ministériu Públiku (MP) hodi hein prosesu investigasaun tuir mai.

Lee Mós : Padre Abito Nia Mate, Arkidioseze Díli ho Família Hein Hela Rezultadu Autópsia

Matebian Padre Abito José Bristes Casimiro. Foto/Dok. Espesiál

Portavós PCIC, Octávio da Costa Araújo, informa, kazu ne’ebé mak akontese iha Segunda (22/08/2022), ne’ebé rezulta Padre Abito José Bristes Casimiro, lakon vida, PCIC simu keixa hosi família ho parte Arkidioseze  nian hodi husu bá autoridade polisiál sira, atu halo prosesu investigasaun, ka prosesu inkéritu.

Keixa hosi parte família ho Arkidioseze ho objetivu atu autoridade polisiál sira, liu-liu PCIC bele halo investigasaun kle’an, nune’e bele hatene loloos motivu hosi Padre Abito nia mate. Karik mate tanba ho asidente tráfegu ka kauza hosi buat seluk.

“Hafoin ita simu tiha keixa hosi parte família padre nian ho parte Arkidioseze Díli, PCIC kontinua submete mate-isin, hodi halo autópsia no rezultadu autópsia, doutór sira submete ona mai PCIC no PCIC junta iha prosesu hodi haruka ona bá iha Ministériu Públiku nu’udár na’in bá asaun penal hodi hahú halo prosesu inkéritu,” Octávio da Costa Araújo, informasaun bá jornalista sira iha kna’ar fatin, Caicoli, Díli, Kuarta (31/08/2022).

Rezultadu hosi autópsia ne’e rasik, PCIC seidauk labele fó sai bá públiku, tanba ida ne’e tama bá segredu justisa. Maibé, evidénsia hirak ne’ebé mak iha lokál krime, PCIC konsege rekolla hotu ona.

“Informasaun hosi testemuña balu ne’ebé mak antes Amu mate ka  depois Amu mate, sé-sé de’it mak ho Amu la’o iha momentu ne’ebá, PCIC hahú rona hanesan informasaun inisiál de’it. Depois iha semana kotuk, PCIC remete tiha ona, prosesu ne’e hotu bá iha prokuradór, no ita hein de’it rezultadu,” portavós  PCIC Octávio Araújo hateten.

Lee Mós : Investigasaun Ba Padre Abito Nia Mate, PCIC Hein Rezultadu Autópsia HNGV

Hatán kona-bá, karik PCIC mós halo  ba transporte ne’ebé evakua mate-isin Padre Abito nian hosi Dare HNVG ne’e, karreta privádu ka Governu, Octávio dehan, ema sé de’it ka interveniente sira ne’ebé mak iha relasaun ho prosesu kazu ida ne’e PCIC halo hotu ona identifikasaun bá sira.

“Balu PCIC hahú bolu,  PCIC notifika sira, PCIC rona informasaun inisiál de’it, bá hirak ne’ebé mak antes akontesimentu ka  depois akontesimentu, hatene informasaun ruma, PCIC rekolla tiha informasaun sira ne’e. Entaun, informasaun báziku ne’e maka, PCIC tau iha auto-notísia, hodi informa bá iha Ministériu Públiku,” portavós PCIC ne’e informa tán.

Kona-bá durasaun tempu sira ba iha prosesu inkéritu ba kazu ne’e, Octávio Araújo dehan, PCIC ninia devér ka obrigasaun mak submete ona prosesu bá MP. Intermu atu halo delegasaun kompeténsia bá investigasaun kle’an hosi kazu ne’e, depende ba Prokuradoria Jerál Repúblika, atu delega fila-fali ba PCIC ka ba instituisaun polísia sira seluk.

Lee Mós : Polísia Sei Investiga Kle’an Padre Abito Nia Mate

Jornalista: Rogério Pereira Cárceres