Hatutan.com, (15 Setembru 2022), Díli—Provedoria dos Direitos Humanos e Justiça (PDHJ), halo ona  investigasaun bá membru Polísia Nasionál Timor-Leste (PNTL) hamutuk na’in-ualu hosi Komandu Munisipiu Dili ne’ebé oras ne’e suspende hela hosi servisu tanba deskonfia involve iha kazu José Bernardo nia mate iha sela Caicoli.

Provedora, Jesuinha Maria Ferreira Gomes.

Provedora, Jesuinha Maria Ferreira Gomes, kompromete katak, iha tempu besik sei anúnsia rezultadu investigasaun ne’ebé haree liu ba direitu umanu no boa governasaun nian.

Lee Mós: Komisaun B Hein Relatóriu Investigasaun Kazu José Bernardo Mate iha Sela PNTL

“Investigasaun kuaze remata ona, tanba ekipa investigadór sira hasoru ona membru Polisia na’in-ualu ne’ebé agora hetan suspensaun ne’e, depois tenke hasoru ho familia sira. Bainhira hotu tiha sei halo konkluzaun no halo rekomendasaun. PDHJ sei fó sai nia rezultadu ba públiku,” Jesuinha Maria Ferreira Gomes hateten hafoin partisipa iha serimónia solene Kinta Lejislatura iha PN, Kinta (15/09/2022).

Konteúdu Investigasaun ne’ebé PDHJ halo, haree liubá aspetu rua mak hanesan direitu umanu ho boa-governasaun.

Iha asuntu Boa-Governasaun ninian, PDHJ hakarak haree kona-bá administrasaun la di’ak, liu-liu atendimentu públiku, prosesu monitorizasaun, nune’e mós atu haree kona-bá ilegalidade, asaun sira ne’ebé durante ne’e halo, tuir lei ka la’e.

“Ida ne’e mak ita investiga. Agora, direitus umanus nian, liu-liu ita hakarak haree kona-bá direitu ba vida, depois direitu ba Liberdade, integridade, seguransa, kona-bá tratamentu aat, nune’e mós atu haree kona-bá detensaun arbitrária,” Provedóra ne’e esplika.

Hatán kona-bá karik iha duni indísiu ruma ne’ebé indika membru PNTL na’in-ualu ne’e involve iha kazu insidente José Bernardo nia mate ho kondisaun tara an iha sela detensaun, Jesuinha Gomes dehan, prosesu inevestigasaun la’o hela. Bainhira relatóriu ruma sai ona, hafoin bele haree nia konkluzaun no nia rekomendasaun.

“Agora labele dehan bá imi, tanba seidauk hotu. Depois sei halo press conference ida atu esplika kona-bá rezultadu investigasaun ne’ebé PDHJ halo. Maizumenus semana rua ou tolu tán,” Jesuinha Gomes hateten tán.

Asuntu kona-bá krime nian, PDHJ laiha kompeténsia atu halo investigasaun kriminál. Tanba asuntu kriminál ninian kabe bá kompeténsia hosi Ministériu Públiku (MP), Polisia Nasional Sientífika no Investigasaun Kriminál (PNSIK), Policia Ciêntífica e de Investigação Criminal (PCIC).

Hatutan.com, tenta ona halo konfirmasaun ho Ministériu Públiku kona-bá rezultadu autópsia ne’ebé PCIC sumbete ona bá MP iha loron hirak liubá, maibé Prokuradór Jerál Repúblika, Alfonso Lopes hatán de’it katak, oras ne’e Juíz sira sei iha férias judisiál.

Kazu inisidente tara an, ne’ebé rezulta vítima José Bernardo nia mate tanba deskonfia tara an rasik, akontese iha Kinta (01/09/2022) tuku 20:30, iha seleta detensaun Komandu PNTL Munisipiu Dili iha Caicoli.

Hafoin insidente ne’e mosu, Komandu PNTL liuhosi unidade PNSIK, MP, PDHJ, halo kedan reuniaun ida, hodi forma ekipa konjunta ida, nu’udár komisaun independente hodi akompaña investigasaun kazu ne’e, nune’e bele iha nia transparánsia ba públiku.

Jornalista: Rogério Pereira Cárceres