Hatutan.com, (27 Outubru 2022), Díli—Konsellu Kombatente Libertasaun Nasionál (KKLN) seidauk konklui verifikasaun dadus veteranu tinan 2009 ne’ebé hela Munisípiu Baukau no Ermera, maibé posibilidade sei konklui iha fulan Outubru.

Estrutura KKLN hala’o audiénsia ho Xefe Estadu, José Ramos-Horta iha Palásiu Prezidensiál Bairru-Pité, Kinta (27/10/2022). Foto/Média PR.

“Verifikasaun dadus veteranu 2009 agora sei falta de’it Baukau ho Ermera. Munisípiu sira seluk hotu ona no entrega ona iha nasionál,” Vise Prezidente KKLN, Mário Nicolau dos Reis hateten hafoin enkontru ho Xefe Estadu iha Palásiu Prezidensiál Bairru-Pité, Kinta (27/10/2022). 

Bainhira sira lori mai hamutuk iha nasionál mak KKLN sei tuur hamutuk haree fali programa ida atu fó sai.

Nune’e, KKLN mós simu deklarasaun no kontestasaun lubuk ida husi baze dadus ninian, ne’ebé lori mai ona iha nasionál.

“Ami sei haree lai 2009 ninian konklui tiha mak ami haree fali 2003 ninian, sira ne’ebé halo kontestasaun ho reklamasaun kuaze 6.000,” nia hateten.

Molok ne’e, Prezidente KKLN Vidal de Jesus ‘Riak Leman’ hateten, ekipa verifikasaun nasionál fahe ba grupu tolu mak dezloka ba munisípiu sira iha territóriu nasionál atu halo verifikasaun ba dadus veteranu ne’ebé rejistadu iha tinan 2009 na’in 120.000-resin.

Veteranu na’in 71 Sei Simu Kondekorasaun

Veteranu na’in 71 sei simu kondekorasaun iha loron proklamasaun indepedénsia ba dala 47 iha 28 Novembru ne’ebé sei realiza iha Munisípiu Manatuto.

Hosi total númeru ne’e, Munisípiu  Manatuto iha na’in 50 no hosi Xefe Kasa Militár Prezidénsia Repúblika na’in 21.

Vise Prezidente KKLN, Mário Nicolau dos Reis hateten Loron proklamasaun indepedénsia 28 Novembru tinan ne’e sei halo iha Munisípiu Manatuto, entaun Manatuto mak sei ba iha ne’eba hamutuk ho agresiadu sira hosi Kaza Militár Prezidénsia Repúblika preprapa ona.

Jornalista: Vito Salvadór