Hatutan.com, (16 Novembru 2022), Díli- Prezidente Repúblika (PR), José Ramos-Horta, hateten tinan oin, Timor-Leste tama ona tinan polítika,  tamba ne’e partidu polítiku (ParPol) ho nia lider sira tenke iha kompromisu bá programa la’ós halo promesa falsu hodi bosok povu.

Lee Mós : Prezidente Repúblika Promulga Dekretu Lei Subsídiu $200

Prezidente Repúblika, José Ramos-Horta. Foto/Elio dos Santos da Costa

Xefe Estadu bá jornalista sira iha Sentru Bambu Tibar, Kuarta (16/11/2022) hateten, ParPol ho nia lider sira no mós líder nasionál hotu tenke garante unidade nasionál hodi hasoru eleisaun parlamentar 2023.

Xefe Estadu  iha relasaun metin ko’alia ho líder sira hotu no lider sira  hahú ho maun-boot Xanana Gusmão, Marí Alkatiri, Primeiru-Ministru Taur Matan Ruak, Prezidente Repúblika períodu 2017-2022, Francisco Guterres “Lú Olo”,  Eis-Tenente Jenerál Lere Anan Timur merese hetan respeitu..

“Lider supremu partidu KHUNTO José dos Santos Naimori mak to’o agora seidauk hasoru, maibé hasoru ona tia Vise-Primeira Ministra Armada Berta, enkontru di’ak loos. Purtantu, laiha problema, ema hotu bele haree ambiente desde fulan-Maiu mai oin ne’e ambiente di’ak ho Parlamentu Nasionál, Governu, Prezidénsia. Ha’u nia responsabilidade mak ida ne’e buka viabiliza Governu nia servisu, Prezidente Repúblika labele sai opozisaun ba Governu ka halo konfrontasaun ho Parlamentu Nasionál,” Prezidente Repúblika José Ramos-Horta hateten.

Xefe Estadu hatutan, preokupadu boot mak prepara an atu ba eleisaun Parlamentár tinan 2023 ne’e besik ona, la’o ambiente di’ak, pasífiku labele hanesan kampaña Prezidensiál tolok, insulta depois kandidatu balun nia elementu ka apoiante hetan ameasa.

Xefe Estadu hakarak haree kampaña eleisaun Parlamentár 2023 ne’e 100% sivilizadu, laiha atake, insultu pessoal ruma entre partidu sira, tenke la’o loloos.

“Partidu sira aprejenta bá povu ida-idak nia programa, ha’u haree partidu la aprejenta nia programa, ha’u husu nu’udar Xefe Estadu ha’u entreven, imi nia programa iha ne’ebé, ha’u hakarak haree, la’ós bá de’it promesa, vota bá ami, ami hatama o ba asesór, vota bá ami hetan kadeira rua depois lobi ho CNRT, FRETILIN atu halo ai-tonka, ha’u sei akompaña 100%,” Ramos-Horta afirma.

Ramos-Horta sublina partidu ne’ebé ko’alia mangame, la aprejenta programa sei bolu CNE hodi hatete partidu saida mak ne’e, aviza kedas partidu sira, hakarak haree programa aprezenta bá povu.

Jornalista: Vito Salvadór