Hatutan.com, (10 Fevereiru 2023), Díli—Polísia Sientífika Investigasaun Kriminál (PCIC, sigla portgés), Kinta (9/2/2023), ezekuta mandadu  foun hosi Tribunál Distritál Díli (TDD) hodi halo buska no apreensaun iha rezidénsia Longuinhos Monteiro iha Aldeia Trans, Suku Vatu Voro, Loes, Postu Administrativu Maubara, Munisípiu Liquiça.

Lee Mós :  Tribunál Liberta Longuinhos Monteiro Tanba Buska no Apreensaun Hosi PCIC Ilegál

Xefe Kaza Militár interinu Prezidénsia Repúblika ho nia adjuntu marka prezensa iha proseus buska no apreensaun bá rezidénsia Longuinhos Monteiro iha Loes, Liquiça, Kinta (9/2/2023). Foto/Espesiál

Liuhosi video, foto no informasaun ne’ebé Hatutan.com asesu hosi fonte sekreta sira katak prezensa ekipa PCIC nian iha rezidénsia antigu Prokuradór Jerál Repúblika nian ne’e baze bá delegasaun kompeténsia hosi TDD ho mandadu buska no apreensaun tuir númeru Úniku Kriminál (NUC) 0030/23/PCIC.

PCIC ho nia ekipa to’o iha rezidénsia atuál Asesór prinsipál Prezidente Repúblika,  José Ramos-Horta nian ne’e, hale’u tuku 11.00 Otl, hodi ezekuta mandadu buska no apreensaun foun hosi TDD. Maibé, Xefe Kaza Militár interinu Major Francisco da Silva ho nia adjuntu  Superintendente Polísia João Belo,  husu PCIC atu hapara lai buska no apreensaun ne’e.   

Antigu Komandante Jerál PNTL no mós anrtigu Ministru Interiór, Longuinhos Monteiro hamutuk ho nia advogadu privadu mós akompaña hotu buska no apreensaun ne’ebé halo hosi autoridade PCIC ne’ebé nia rezultadu la hetan evidénsia faun ruma.

Fontes  balun iha PCIC ne’ebé rejeita  fó nia identidade informa bá Hatutan.com katak Xefe Kaza Militár no nia adjuntu marka prezensa iha terrenu ka iha rezidénsia Longuinhos Monteiro nian ne’e tanba sira dehan, sira hetan orientasaun direta hosi Prezidente Repúblika, José Ramos-Horta, atu akompaña prosesu ne’e. Basá, Longuinhos Monteiro hanesan mós asesór prinsipál ida iha Palásiu Prezidensiál.

Iha Segunda, 16 fulan-Janeiru 2023, PCIC halo buska no apreensaun, iha rezidénsia  Longuinhos Monteiro  nian iha Leos ne’e konsege hetan evidénsia arma sensitivu hanesan munisaun borraxa, munisaun real, arma fogu, arma ventu no arma branka.

Ho evidénsia sira-ne’e, PCIC mós halo kedas identifikasaun no detensaun ba Longuinhos Monteiro iha sela PCIC hodi kontinua submete ba primeira interrogatóriu iha Tribunál Distritál Díli.

PCIC komunika hela ho ema balun iha prosesu buska no apreensaun iha rezidénsia Longuinhos Monteiro nian iha Loes, Liquiça, Kinta (09/2/2023). Foto/Espesiál

Iha Kuarta, 18 fulan-Janeiru 2023, Tribunál Distritál Dili (TDD) hasai  despaixu ne’ebé deside hodi liberta totál arguidu eis Ministru Interior, Longuinhos Monteiro tanba prosesu sira kona-bá buska no apreensaun hosi PCIC nian ne’e  konsidera ilegál.

“Tribunál, depois de simu promosaun hosi Ministériu Públiku no observa legalidade tomak haree katak, prosesu kapturasaun, apreensoins no buskas ne’ebé mak halo bá ami nia kliente ilegais no la tuir Lei. Entaun, absolve tiha ka liberta imediata. Ida ne’e de’it,” Defensór Públiku, Fernando Lopes de Carvalho, ne’ebé fó asisténsia legal bá Longuinhos Monteiro hateten iha TDD, tempu ne’ebá.

Iha loron ne’e kedas, TDD hasai hikas mandadu buska no apreensaun bá PCIC hodi halo pasa revista bá rezidénsia Longuinhos Monteiro nian iha Fomento, Díli, ne’ebé rekolla mós evidénsia balun no daudaun ne’e autoridade Polísia asegura hela  hodi kontinua nia prosesu kriminál.

Lee Mós : PCIC Viola Norma Prossesuál Maibé Longuinhos Monteiro Responsabiliza Nafatin Aktu Kriminál

Jornalista : Rogério Pereira Cárceres