Hatutan.com, (23 Fevereiru 2023), Díli- Prezidente Repúblika (PR), José Ramos-Horta, liuhosi nia gabinete Prezidénsia Repúblika, Tersa (21/2/2023), distribui apoiu bá kbiit-la’ek sira iha Aldeia Boleha, Suku Soba, Postu Administrativu Laga, Munisípiu Baucau.

Duarte Pereira, ne’ebé moris ho kondisaun defisiénsia fízika hetán apoiu hosi Preizdente Repúblika. Foto/GPR

Komunikadu ne’ebé Hatuta.com asesu hosi gabinete média Palásiu Prezidensiál, relata katak família vunerál ne’ebé hetan apoiu ne’e mak Duarte Pereira ne’ebé sofre Asidente Vascular Cerebral – AVC ka Stroke iha tinan 2019, hodi halo nia sai defisiénsia no susar atu halo mobilidade.

Defisiénsia fízika ne’e obriga Duarte hodi husu bá nia kaben atu halo divórsiu, hodi fila bá nia família hamutuk ho nia oan-mane ida no Duarte hela ho oan-mane rua ho feto-ikun ho idade tinan 12.

Oan-Mane dahuluk hanesan estudante Ensinu Sekundáriu Tekinomata, daruak deside la eskola hodi tau matan ba família.

“Duarte Pereira hela mesak, nia feen divórsiu tambá kondisaun moris. Mézmu kondisaun nune’e, nia (Duarte) sempre hetan mós tulun husi nia oan, família viziñu inklui Suku rasik ne’ebé sempre oferese hahán balun. Durante ne’e, hetan asisténsia maka’as husi nia oan-feto ho idade tinan 12 tau matan ba nia apa nia hahán (te’in) no nesesidade seluk ne’ebé nia apa presizam,” Xefe Suku Soba, Francisca Mónica de Fátima Soares haktuir.

Tuir Xefe Suku Soba, Nísia tenke prepara matabixu, ai-han meiu dia no mos kuru bé, molok bá eskola no uza de’it lampra hodi estuda iha tempu kalan, tanba Aldeia Boleha seidauk asesu bá eletrisidade.

Vítima inséndiu iha Aldeia Bahira, Suku Kakavei, Postu Administrativu Lospalos, Munisípiu Lautem, simu apoiu hosi Prezidente Repúblika. Foto/GPR

Autoridade lokal ne’e mos agradese bá apoia ne’ebé mai hosi Prezidénsia Repúblika bá komunidade vulneravel iha nia suku no agradese mós ba ekipa ne’ebé halo terapia bá komunidade sira.

Apoiu ne’ebé gabinete Prezidénsia Repúblika fó kompostu husi fos, mina te’in, kolxaun no nesesidade bázika seluk. Apoiu hirak ne’e entrega  direta husi Asesór Prezidente Repúblika ba Servisu Sosiedade Sívil no Asuntu Sosiál Quintiliano Moníz Carvalho.

Prezidente Repúblika, José Ramos-Horta, orienta asesór sira  Prezidente Repúblika bá Servisu Sosiedade Sívil no Asuntu Sosiál apoia vítima inséndiu iha Aldeia Bahira, Suku Kakavei, Postu Administrativu Lospalos, Munisípiu Lautem.

Ahi-han rezidénsia Alina Pereira iha fulan-Janeiru 2023 no la salva sasán ne’ebé mak rai iha uma-laran.

Inséndiu ne’e akontese kauza hosi ahi husi dapur no alastra bá uma tomak no la konsege hamate tanba vítima hela mesak iha to’os.

“Ami kontente tebes bá ajudu hirak ne’e, obrigadu barak bá Prezidente Repúblika Horta,” Alina Pereira hateten.

Antes ne’e, vítima hetan apoiu umanitáriu husi autoridade munisipál ho kolaborasaun husi autoridade lokál husi Suku Kakavei.

“Prezidénsia Repúblika hanesan ita hotu hatene katak iha tulun ida ne’ebé presiza ami, tuir orientasaun husi Xefe Estadu, ami bele apoiu, tuir kbiit orsamentu, hanesan tinan 2008 liu-ba, iha primeiru Prezidénsia nian, harii uma bá kbiit-laek no ajudu umanitáriu seluk tan,” Quintiliano Moníz Carvalho haktuir.

Hafoin ne’e, ekipa Prezidénsia Repúblika kontinua distribui apoiu ba família vulneravel iha Munisípiu Viqueque.

Jornalista: Vito Salvadór