Hatutan.com, (02 Marsu 2023), Dili-Pesoál Seguransa iha Edifísiu Prokuradór Jerál Repúblika (PGR) nian iha Colmera, Díli, aplika regra foun bá jornalista sira ne’ebé atu halo kobertura iha arredores edifísiu PGR nian tenke aprezenta karta autorizasaun hosi PGR hodi halo ativida jornalistika iha PGR.

Lee Mós : PDHJ Aprezenta bá PGR Preokupasaun Kazu Mate iha Sela Detensaun PNTL ho Agresaun Fíziku bá Joven Ida iha Maliana

Edífisiu PGR, Colmera, Díli. Foto/Elio dos Santos da Costa

Durante ne’e no tempu sira liubá repartisaun Estadu nian inklui Edifísiu PGR, Tribunál Rekursu ho mós Tribunál Distrital sira fó asesu livre bá jornalista sira atu halo atividade Jornalístiku, tanba Timor-Leste nia Konstituisaun iha artigu 41 garante kona-bá Liberdade Imprensa no Liberdade bá Asesu Informasaun.  

Iha Kinta (2/3/2023), hale’u tuku 14:45 Otl, jornalista sira hakat bá edifísiu PGR hodi halo kobertura bá sorumutuk Provedór bá Provedoria Direitu Umanu no Justisa (PDHJ), Virgílio da Silva Guterres, ho PGR Alfonso Lópes. Maibé, bainhira jornalista sira hakat tama bá arredores edifísiu PGR nian hetan kedas impedimentu hosi pesoál seguransa hodi la bele tama iha edifísiu PGR no orienta  jornalista sira tenke hein de’it iha portaun li’ur edifísiu PGR nian.

Jornalista sira ne’ebé bá hlao kobertura bá sorumutuk PDHJ ho PGR nian ne’e esplika ona sira-nia presenza atu halo kobertura bá sorumutuk PDHJ ho PGR nian, maibé pesoál seguransa ne’e (la identifika nia identidade) la admite tama tenke aprezenta karta autorizasaun entrevista hosi PGR.

“Jornalista sira mai, labele tama liubá laran, hein iha li’ur ne’ebá de’it, iha portaun li’ur, labele tama. Sé laiha karta entrevista, labele tama. Hein iha ne’ebá de’it, uainhira iha autorizasaun ruma mak ami haruka maun sira tama. Agora labele tama, bele bá hein iha ne’ebá (portaun oin sai nian) de’it,” pesoál seguransa ne’e hateten bá Jornalista sira.

Jornalista sira mós kolabora no kumpre orientasuan hosi pesoal seguransa ne’e hodi hein iha portaun li’ur parte loro-as’e nian to’o sorumutuk PDHJ ho PGR nian termina iha tuku 17:16 Otl.

Edífisiu PGR, Colmera, Díli. Foto/Elio dos Santos da Costa

Durante oras ida nia laran, derrepnti mosu mai pesoal relasaun públiku PGR nian  mai konversa ho jornalista sira katak “ha’u haree belun sira tuur mesak iha li’ur ne’e mak hau mós sai mai ne’e. Imi tuur mesak ami la sai mai mós ladún di’ak, tanba ita ema ne’e mak haree malu. Mais agora regra mak dehan hanesan ne’e, ami mós labele ko’alia buat ida. Oras ida, iha laran, ami mak todan fali,”.

Ko’alia tiha nune’e, to’o fali minutu balu, pesoál ne’e mós fila no tama fali bá laran, kontinua serbisu fatin,  hodi husik hela jornalista sira iha li’ur, hein to’o tempu sorumutuk ne’e konklui.

Provedór PDHJ, Virgílio da Silva Guterres, ne’ebé sai mai varanda edifísiu PGR nian hateke kona jornalista sira iha portaun li’ur. Nune’e, Provedor PDHJ, Virgílio da Silva Guterres, hakbesik mai jornalista sira hodi kumprimenta no halo entrevista kona-bá sorumutuk refere.

Sorumutuk Provedór PDHJ ho Prokuradór Jerál Repúblika ne’e, nu’udár vizita kortezia, tanba PDHJ iha parseiru importante sira, liu-liu oinsá atu garante justisa, no ministériu públiku ka prokuradoria jerál repúblika ne’e, sai hanesan parseiru importante ida Provedór ninian, tanba iha kazu sira, keixa sira ne’ebé mak dalaruma implika krime, Provedoria sempre enkamiña mai ministériu públiku.

“Entaun, mai, alende introdus aan hanesan Provedór foun bá Prokuradór Jerál Repúblika, no mós fó hanoin bá kazu sira, notísia de krime ne’ebé mak Provedoria hatama mai Prokuradoria Jerál Repúblika,” Provedór Virgílio Guterres, antigu prezidente Conselho de Imprensa Timor-Leste ne’e hateten.

La’ós ne’e de’it, parte rua ne’e mós ko’alia kona-bá akordu ne’ebé mak entidade rua halo tiha ona, liuhosi memorandu  entendimentu iha 2021, entaun, oinsá atu kontinua bá oin.

Maske la ko’alia bá média sira, maibé, durante audiénsia ne’e, Prokuradór Jerál Repúblika, Alfonso López, aprezenta ninia preokupasaun lubuk ida bá Provedór PDHJ liu-liu kona-bá lei Protesaun bá testemuña sira.

“Ita seidauk iha Lei Protesaun bá Testemuña tanba ne’e maka, iha kazu balu, testemuña sira barak ta’uk atu fó sasin, tanba laiha mekanizmu protesaun bá sira. Entaun, ida ne’e, sai hanesan preokupasaun ida mós hosi parte provedoria ninian. Ne’ebé ha’u hanesan Provedór, hatete katak, ida ne’e asuntu ida ne’ebé mak sei sai hanesan advokasia koletivu,” Virgílio Guterres hateten.

Provedór Virgílio Guterres dehan, sé iha biban hasoru malu ho ministériu relevante, liuliu ministériu justisa, sei hato’o preokupasaun ne’e, atu nune’e bele iha lei ne’ebé mak bele fó seguransa ka fó protesaun bá ema sira ne’ebé mak sai sasin bá kazu, ka bá keixa sira ne’ebé mak tama, liuliu keixa kona-bá korrupsaun ka kona-bá violénsia ninian.

Jornalista: Rogério Pereira Cárceres