Hatutan.com, (08 Marsu 2023), Díli—Primeiru Ministru (PM) no atuál Ministru Interiór (MI), Taur Matan Ruak, simu ona lista Ofisiais Polísia Nasionál Timor-Leste (PNTL) hamutuk na’in-sia ne’ebé aprezenta hosi Konsellu Superiór nu’udár kandidadtu forte atu bele assume kargu hanesan Komisáriu fóun PNTL.

Vise-Ministru Interiór (VMI), António Armindo maski la temi naran kompletu, maibé nia dehan lista ne’ebé aprezenta ona hosi Konsellu Superiór PNTL bá Ministériu ho totál ofisiais na’in-sia maihosi membru ativu iha instituisaun ne’e no laiha ema sivíl.

“Lista ne’ebé Komandu Jerál aprezenta ona kona-bá Komisáriu fóun bá PNTL ninian ne’e iha ona Primeiru Ministru nia meza, hanesan ministru do interiór,” António Armindo hateten hafóin sorumutu Konsellu Ministru Ordináriu iha Palásiu Governu Díli, Kuarta (08/03/2023).

Tuir Lei orgánika PNTL nian, membru Governu ne’ebé lidera Ministériu Interiór, nia mak iha liu kompeténsia tomak, atu hili ka nomeia Komandante Jerál fóun PNTL.

Komandu PNTL liuhosi enkontru Konsellu Superiór Polisia ninian, sira halo ona paresér, nune’e mós ajusta kedan ho karta rekomendasaun, tanba ho hanoin ida katak, Ministru bele konsidera.

“Maske iha rekomendasaun, iha paresér no seluk tán atu konsidera ka la konsidera, ne’e kompeténsia Ministru nian. Ministru bele la konsidera, nia hili tuir ida ne’ebé mak nia hakarak, tanba ne’e kompeténsia nia rasik,” António Armindo subliña.

Hatán kona-bá to’o bainhira mak Ministru Interiór atu aprezenta lista sira ne’e bá diskute iha Konsellu Ministru, António Armindo dehan, possibilidade ‘kuarta semana oin’, tanba iha segunda, 27 Marsu 2023 ne’e Komisáriu fóun PNTL nomeadu, tenke simu posse.

Tanba ne’e, desizaun tenke antes, nune’e komandu, ministériu mós hatene ona, sé mak bá no preparasaun loron espesiál ne’e mós presiza rekursu.

Importante presiza planu halo di’ak, atu eventu ne’e bele la’o di’ak, maibé ne’e kabe bá kompeténsia Primeiru Ministru.

Jornalista: Rozer Cárceres