Hatutan.com, (17 Marsu 2023), Díli-Oras ne’e, daudaun númeru ka kuantidade membru Polísia Nasionál Timor-Leste (PNTL) nian ne’ebé destakadu iha eskuadra polísia sira mínimu tebes. Situasaun ne’e, difikulta mós polísia atu halo atendimentu bá kazu krime sira ne’ebé dalaruma loron ida bele akontese krime rua ka tolu.

Lee Mós : Governu Nomeia Henrique da Costa ho Pedro Belo Lidera PNTL

Vise Ministru Interiór (VMI), António Armindo hateten, tuir ministériu nian kalkulasaun ne’ebé hatuur tiha ona iha planu antes kona-bá atu halo tán rekrutamentu foun ne’e, hodi garantia seguransa bá iha territóriu nasionál presiza tan ema kuaze rihun 7 to’o  rihun 8.

Vise Ministru Interiór, António Armindo. Foto/Dok. Hatutan.com

“Ita presiza tan efetivu na’in rihun 7 ka rihun 8 tanba iha diresaun barak, unidade barak, ita iha postu barak, ne’ebé maka tenke koloka sira bá. Sé ita-boot sira hatene, agora daujdauk ne’e, ita nia membru sira iha ita-nia eskuadra ne’e menus loos,” Vise Ministru, António Armindo hateten bá jornalista sira iha Ministériu Finansa, Ai-tarak Laran, Díli, Sesta (17/03/2023).

Tuir António Armindo, Governu presiza duni halo rekrutamentu, la’ós tinan ne’e, mais 2024, nia fiar katak, sei bele realiza planu rekrutamentu ida ne’e.

Iha 2022, ministériu interior planu ona atu halo rekrutamentu foun fó espasu bá joven Timoroan sira, atu bele prienxe iha vaga PNTL nian ne’ebé tuir planu sei rekruta ema hamutuk 720. Maibé la konsege halo no  Governu foun mai sei halo planu ne’e, oinsá mak atu halo rekrutamentu no rekruta na’in hira.

Instituisaun PNTL dezde harii iha 2002, oras ne’e eziste ona ho nia unidade sira mak hanesan, Unidade Patrullamentu Fronteira (UPF), Unidade Polísia Marítima (UPM), Unidade Espesiál Polísia (UEP), kompostu hosi Batallaun Ordém Públika (BOP), Corpo Segurança Pessoal (CSP), iha mós unidade ida naran EOD, inklui Polísia Komunitária mak iha Komandu Munisípiu sira hotu iha territóriu RDTL.

PNTL iha mós ekipa Task Foce sira, Unidade Tránzitu iha Munisípiu no Nasionál, iha Departamentu Investigasaun Kriminál (DIK), Unidade Narkótika, inklui  Servisu Informasaun Polísia (SIP) ne’ebé mak destakadu iha Kuartél Jerál PNTL.

Totál membru PNTL ne’ebé oras ne’e sei ativu iha instituisaun seguransa ne’e hamutuk rihun 4 resin destakadu iha territóriu nasionál.

Jornalista: Rogério Pereira Cárceres