Hatutan.com, (13 Abríl 2023), Díli-Autoridade Protesaun Sívil (APC-sigla portugés) simu doasaun montante $550,000 hosi Uniaun Europeia hodi haree kona-bá oinsá halo jestaun bá risku dezastre iha Timor-Leste.

Lee Mós : Semana Ida Liubá, Uma 28 Hetan Estragu no Labarik Ida Mate

Prezidente APC, Ismael da Costa Babo hateten, apoiu ida-ne’e hosi Illa Pasífiku sira hamutuk 15 inklui Timor-Leste ne’ebé mak ninia sekretáriadu destaka iha Fiji. Orsamentu ida-ne’e, nu’udár apoiu bá faze daruak nian atu APC bele ezekuta tuir planu ne’ebé mak iha ona.

APC organiza Workshop kona-bá konsultasaun tékniku bá jestaun risku dezastre iha Bemori, Díli, Kinta (13/04/2023). Foto/Elio dos Santos da Costa

“Iha País 15 inkuli Timor-Leste iha País ida Pasífiku ne’e, hetan mós benefísiu bá projetu ne’e. Totál orsamentu ne’ebé ita Timor hetan projetu ida-ne’e ho osan  Euro 550,000  mai hosi Uniaun Europeia,” Prezidente APC, Isamael Babo hateten, durante workshoop kona-bá konsultasaun tékniku, bá implementasaun projetu segunda faze iha Salaun MSSI, Bemori, Díli, Kinta (13/04/2023).

Iha tinan-lima (5) liubá, Protesaun Sívil hetan tiha ona projetu ne’e iha primeiru faze. Rezultadu hosi projetu ne’e konsege harii torre rua iha área kosteira ka tasi ninin, ida iha Aeroportu Comoro, no ida seluk iha Lecidere. Torre rua ne’e, instala ho objetovu fó alerta ka aviza populasaun sira, uainhira mosu dezastre Tsunami ka tasi-sa’e.

La’ós ne’e de’it, iha projetu dahuluk nian, konsege estabelese ona mós sentru evakuasaun rua iha Fronteira Súl, Munisípiu Covalima (Suai), no parte Oeste Súl, iha Munisípiu Viqueque.

“Sentru evakuasaun ne’e nia operasionalizasaun la’o hela, ida iha Viquque, ita uza hela bá ita-nia armajen, ita-nia edifísiu, no situasaun emerjénsia, ita bele evakua ita-nia populasaun sira. Iha Suai nian mak, uza hela bá eskola. Situasaun normál, ita uza hela bá eskola, mais kuandu dezastre, fatin ne’e, ita transforma bá sentru evakuasaun,” Isamel Babo hateten.

Oras ne’e, APC halo hela konsultasaun tékniku, hafoin re-estabelese fali tán estrutura molok, implementasaun projetu segunda faze ho Euro 550,000. Iha projetu bá-daruak ne’e, sei foka liubá kapasitasaun rekursu umanu, halo avaliasaun bá área risku balu iha munisipiu rua ne’e.

Projetu ida-ne’e, kontinua nafatin, hodi konsentra bá iha munisípiu rua ne’e, liu-liu bá aumenta kapasitasaun lider komunitária sira oinsá atu halo jestaun bá dezastre ruma, kuandu akontese bá munisipiu rua ne’e, nomós guia fali giaun ruma, hodi oinsá atu utiliza sentru evakuasaun rua ne’e.

Alende ida ne’e mós, hosi fundu hirak ne’e, APC hakarak injeta, aumenta tán fali atividade balu, liu-liu atividade nasionál ne’ebé sira planeadu no atu implementa kada tinan, no parseiru sira mai atu komplementa balu, tanba iha atividade balu ne’ebé mak orsamentu estadu la kobre.

“Osan Euro 550,000  kobre fali atividade sira ne’ebé mak ita la kobre hosi ita-nia orsamentu,” Ismael da Costa Babo hateten.

Ismael Babo konsiente katak, orsamentu ho Euro 550,000 ladun kobre hotu programa sira, maibé, sira tenta nafatin halo aproximasaun ho parseiru sira seluk hodi bele kobre tán programa sira APC nian.

Jornalista : Rogério Pereira Cárceres