Hatutan.com, (25 Abríl 2023), Díli–Komísiu da-neen Partidu Kmanek Haburas Unidade Nacional Timor Oan (P. KHUNTO), Tersa (25/4/2023), hala’o iha  Munisípiu Lautem. Biban ne’e, Prezidente Partidu KHUNTO, Armanda Berta dos Santos, kompromete bá Lautem oan sira katak, bainhira povu fó konfiansa bá Partidu KHUNTO hodi kontinua iha Governu Konstitusionál da-IX sei fó prioridade bá iha infrastrutura bázika sira hanesan, estrada ligasaun postu bá to’o iha fatin turizmu sira iha Munisípiu Lautem laran.

Lee Mós : Abertura Kampaña KHUNTO iha Ainaro, Aprezenta Programa Prioridade Tolu

Lider Supremu P.KHUNTO, José dos Santos “Naimori Bucar” ho Prezidente P. KHUNTO, Armanda Berta dos Santos. Foto/Espesiál

KHUNTO mós hakarak hadi’a no dezenvolve fatin turístiku sira, prepara kondisaun bee-moos, saneamentu no  rekrutamentu timoroan sira hodi kuída fatin turístiku sira ne’e.

Liuhosi komunikadu imprensa ne’ebé Hatutan.com asesu sita mó  Armanda Berta dos Santos nia kompromisu bá Lautem oan sira atu tau prioridade mós bá dezenvolvimentu setór agrikultura no hadi’a hadi’a sistema agrikultura tradisionál bá modernu no dezenvolve setor pekuária atu dudu ekonomia povu nian.

Perante simpatizante no militante sira ne’ebé partisipa iha komísiu partidu KHUNTO nian iha Kampu Futeból Lautem Villa, Armanda Berta dos Santos, hateten, Lautem nu’udár munisípiu ne’ebé iha ninia líder rezisténsia barak. Líder sira ne’e barak mak iha vizaun polítika bá Estadu ida-ne’e hanesan KHUNTO, iha hametin unidade nasionál, hodi foka bá hakbesik dezenvolvimentu ba ninia povu sira. Tan-ne’e, KHUNTO, nia orientasaun polítika  bá hametin unidade nasionál.

Partidu KHUNTO hala’o kampaña iha Munisípiu Lautem, Tersa (25/4/2023). Foto/Espesiál

Lider Supremu partidu KHUNTO, José dos Santos “Naimori Bucar” apresia ho Lautem oan sira ne’ebé sempre iha kontribuisaun opiniaun no asaun  hodi atinji Timoroan hotu nia mehi iha ukun rasik an. Katak liberta ona patria no tenke halo esforsu hamutuk hodi liberta tan povu husi ki’ak no mukit.

Kampaña Eleitorál daneen ne’e la’o tuir regras ne’ebé estabelese ona husi parte kompotente sira. Komísiu ida-ne’e hetan seguransa hosi Polísia Nasionál Timor-Leste no supervizaun hosi ekipa Komisaun Nasionál Elisaun (CNE – sígla Portugés).

Jornalista : Vito Salvadór