Hatutan.com, (04 Maiu 2023), Díli– Polísia Nasionál Timor-Leste (PNTL), Unidade Patrullamentu Fronteira (UPF), Sábadu (29/04/2023), halo ona apreensaun osan ho montante Rp330,000,000 hosi Timoroan ida ho inisiál LMM ne’ebé halo viajen hosi Bobonaro mai Díli.

Lee Mós : Kazu Osan $130.000, PCIC Remete Ona Bá Ministériu Públiku

Osan Rupiah hosi Indonézia. Foto/Foti hosi Google

Komandante Departamentu Investigasaun Kriminál (DIK), Superintendente Xefe Polísia George Monteiro, informa iha loron 29 fulan-Abríl 2023, membru UPF sira halo atividade rutina iha sira-nia servisu, hanesan halo passa revista. Iha atividade rutina ne’e, sira konsege detein sidadaun timoroan ida ho inisiál  LMM ne’ebé halo viajen hosi Bobonaro atu mai Díli hodi lori osan Rp330,000,000.

“UPF konsege deteta osan ne’e, no husu mós bá ita nia sidadaun ne’ebé lori osan ne’e, kona-bá osan ne’e mai hosi ne’ebé, osan ne’e atu halo saida, ita-nia sidadaun ne’e la konsege esplika ho di’ak, osan ne’e mai hosi ne’ebé, motivu ne’e atu lori bá ne’ebé, entaun, ita-nia UPF deside hodi halo apreensaun bá osan no halo detensaun bá ita-nia sidadaun ne’e,” George Monteiro hateten bá jornalista sira liuhosi konferénsia imprénsa iha Kuartel Jerál PNTL, Caicoli, Dili, Kinta (04/05/2023).

Iha loron tuir mai, Domingu (30/04/2023), UPF entrega sidadaun ida ne’e, ho evidénsia osan rupiah hirak ne’e bá iha komandu PNTL Munisípiu Bobnaro, hodi halo nia prosesu identifikasaun.

Prosesu identifikasaun bá iha kazu ida ne’e, Polísia investigasaun iha Munisipiu Bobonaro, halo ona prosesu identifikasaun, no kazu ne’e, rejísta ona iha Ministériu Públiku (MP) ho númeru NUC 0063/Bobonaro/Batugade.

Jornalista: Rogério Pereira Cárceres