Hatutan.com, (07 Juñu 2023), Díli- Sekretáriu Jerál Partidu Demokrátiku (PD), António da Conceição “Kalohan” afirma PD iha prinsípiu atu serbí povu ho responsabilidade no sei la ezije kadeira ka pozisaun iha Govenru da-sia (9).

Lee Mós : Enkontru Informál ho Xefe Estadu, Fixu CNRT-PD Forma Governu no 22 Juñu Posse Membru PN Foun

“PD sei la ezije pasta bá membru Governu tanba PD opta prinsípiu responsabilidade no iha defaktu hatudu liuhosi ami nia enkontru ho Prezidente Repúblika,” António da Conceição “Kalohan” haktuir bá jornalista sira iha Palásiu Prezidensiál Nicolau Lobato, Díli, Kuarta (07/06/2023)

Estrutura PD bá hasoru malu ho Prezidente Repúblika, José Ramos-Horta iha Palásiu Prezidensiál, Kuarta (7/6/2023). Foto/Elio dos Santos da Costa

António Kalohan hatutan, Xefe Estadu husu atu hotu-hotu iha responsabilidade bá governasaun da-sia atu sai hanesan Governu ida ho responsabilidade boot bá tinan lima mai, tamba ne’e PD sei ko’alia ho partidu CNRT atu lori konfiansa ne’e ho responsabilidade bá serbí povu.

PD seidauk diskute partikularmente área espesífiku iha governasaun tanba iha sorumutuk ne’ebé halo ho partidu CNRT iha de’it aseitasaun bá koligasaun no la ko’alia bá fahe kadeira tanba seidauk iha enkontru ofisiál atu diskute estrutura governasaun da-sia inklui programa Governu nian.

Kona-bá adiamentu posse no plenária bá VI lejislatura ne’ebé sei dada to’o 22 Juñu, PD laiha objesaun tanba tuir lei ne’ebé konsta katak hafoin validasaun rezultadu eleisaun parlamentár iha Tribunál Rekursu fó prazu loron 15 atu bele iha plenária bá lejislatura foun tanba ne’e tuir de’it rejimentu legál ne’ebé iha.

Iha faitn hanesan Prezidente Partidu Demokrátiku, Mariano Assanami Sabino hateten sorumutuk ho Prezidente Repúblika tanba Xefe Estadu mak konvida atu hato’o kalendáriu no mós hanoin balun ne’ebé atu la’o bá oin, atu konfirma mós PD ho CNRT ninia lala’ok áa oin depois tempu badak Xefe Estadu sei bolu fila fali la’ós ona mai ida de’it maibé PD ho CNRT sei mai hamutuk fali asuntu ida.

“Ami seidauk hamutuk ho CNRT hasoru Prezidente Repúblika ne’ebé seidauk iha diskusaun, primeiru tenke diskusaun bá programa saida mak prioridade tenke tau hamutuk, maske ida-diak ko’alia iha kampaña eleitorál, maibé sei hamutuk atu ko’alia para depois ita hamosu organograma atu realiza programa depois mak atu haree ema ne’ebé atu tama estrutura atu servisu,” Mariano Assanami Sabino hateten.

PD pozisaun saida de’it ne’e partidu prontu hotu, maibé agora ne’e la’ós PD, tanba PD iha de’it kadeira neen  (6) ne’ebé ne’e iha CNRT mak autoridade ida-ne’e, se bainhira PD ho CNRT la’o hamutuk sei ko’alia hamutuk.

Jornalista: Vito Salvadór