Hatutan.com, (30 Agostu 2023), Díli– LSi Business School atribui Doutór Onoráriu bá Vise Primeiru-Ministru, Ministru Koordenadór bá Ekonomia, Ministru Turizmu no Ambiente, Francisco Kalbuadi Lay.

Lee Mós: Cambodia Oferese Tan Bolsu Estudu 10 bá Timoroan

LSi Business School atribui Doutór Onoráriu bá Francisco Kalbuadi Lay atuál Vise Primeiru-Ministru, Ministru Koordenadór bá Ekonomia, Ministru Turizmu no Ambiente. Foto/Espesiál

LSi nu’udár institutu ensinu superior privadu ida iha Phnom Penh, Cambodia, ne’ebé konsentra eskluzivamente bá iha preparasaun jerasaun foun emprendedór ki’ik no médiu empreza sira.  Nune’e, atribuisaun Doutór Onoráriu ne’e bá Ministru Francisco Kalbuadi Lay bazeia bá sira nia peskiza sientífika ne’ebé prienxe rekizitu sira.

Atualmente, liu husi nia programa bacharelatu iha Administrasaun Empreza Bachelor of Business Administration (BBA) ho matéria hotu iha Inglés. Sira nia abordajen aprendizajen asenta iha pilar haat: koñesimentu apoiada iha esperiénsia prátika, internasionalizasaun, estreita kolaborasaun ho komunidade emprezariál no kompromisu ho umanidade.

Reitór LSi Business School, Hem Bonarin hateten, LSi halo peskiza kleur ona bá estilu lideransa Francisco Kalbuadi Lay.

“Ami haree katak, nia iha estilu lideransa di’ak no prienxe ami nia rekizitu ne’e ohin ami atribui títulu Doutór Onoráriu iha lideransa bá nia,” reitór LSi Business School, Hem Bonarin hateten iha komunikadu imprensa ne’ebé Hatutan.com asesu.  

Molok atribui títulu akadémiku ne’e, Vise Reitora no Dekanu Relasaun Internasionál, Susan Hagadorn ne’ebé lee sai biografia Francisco Kalbuadi Lay bá estudante no audiénsia sira tomak katak, atuál Vise Primeiru-Ministru, Ministru Koordenadór bá Ekonomia, Ministru Turizmu no Ambiente Timor-Leste nian ne’e esperiénsia lubuk ida bá iha lideransa.

“Tanba ne’e mak ohin ami sente kontente tebes hodi atribui títulu ne’e ba nia, no espera katak, ho atribuisaun títulu akadémiku ne’e sei sai motivasaun di’ak ida foin sa’e sira iha rai-rua hodi hakat tuir,” nia esplika, Tersa (29/08/2023).

Francisco Kalbuadi Lay simu títulu akadémiku ne’e ho matan-been sulin perante estudante no audiénsia sira hodi dehan, nia la merese atu hetan títulu ne’e, maibé promete katak, nia mós sei la soe leet de’it títulu ne’e.

“Ha’u hatete ba sira karik ha’u ne’e la merese atu simu, maibé liu husi sira nia academic research lubuk ida kompostu husi professor husi nasaun oin-oin bá ha’u hahú husi ha’u sei joven to’o ohin loron, no tuir sira ha’u merese simu ida-ne’e maske todan, maibé ha’u dehan bá sira hanesan ne’e ha’u sei tane saida mak sira fó mai ha’u liu-liu iha área edukasaun oinsá mak nasaun rua bele serbisu di’ak liu-tan. La’ós edukasaun de’it maibé, mós área seluk tan,” Francisco Kalbuadi Lay hateten.

Foto/Espesiál

Durante diskursu, nia mós la haluhan hato’o agradese ua’in áa nia inan ne’ebé permite nia moris iha nia kabun-laran durante fulan sia to’o moris sai boot to’o ohin loron, no mós bá nia aman ne’ebé aman ne’ebé fila uluk ona ba mundu seluk.

“Ha’u fiar ohin husi leten aas bá nia hateke tun mai ha’u simu títulu ne’e nia sei kontente, ba ha’u nia inan, ho família tomak,” nia hateten.

“Prezente ne’ebé ha’u simu la’ós mai ha’u de’it maibé, oferese mós ba eroi sira ne’ebé lakon vida, ema kuaze rihun atus rua tolu nulu resin, agradese nafatin bá sira tanba, ho sira nia luta mak ohin loron ita hetan oportunidade, hanesan daudaun ha’u hamriik bele lori Timor nia naran mai simu títulu doutór onoráriu husi LSi ne’ebé koñesidu tebes iha Cambodia, espera ha’u bele tane mehi ne’ebé sira fó mai ha’u liu-liu Timor-Leste nia naran ba iha futuru”.

Vise Primeiru-Ministru ne’e mós durante nia diskursu la hahulan hato’o agradese ua’in ba Prezidente Repúblika, José Ramos-Horta, Primeiru-Ministru, Kay Rala Xanana Gusmão, nia maluk sira iha partidu CNRT nia laran tomak inklui lideransa sira hotu ne’ebé sempre hanorin Timor-oan hotu atu sempre haraik aan, no tenke servi bá rai Timor-Leste nia di’ak ba oin nafatin.

Nia esplika, iha diplomasia tempu ohin loron nian kompostu husi kanál barak tebes (Track Diplomacy) ne’ebé kooperasaun bilateral entre instituisaun akadémiku sira husi Cambodia ho Timor-Leste nian mós hola parte iha diplomasia.

Jornalista: Vito Salvadór