Hatutan.com, (11 Setembru 2023), Díli- Prezidente Partidu Frente Revolusionáriu Timor-Leste Independente (FRETILIN), Francisco Guterres Lú Olo, hateten partidu FRETILIN seidauk simu komunikasaun direita hosi Prezidente Repúblika (PR), José Ramos-Horta, kona-bá nomeasaun kuadru FRETILIN nian bá Embaixadór foun ne’ebé sei ba reprezenta estadu Timor-Leste iha nasaun amigu sira.

Lee Mós: Horta Propoin no Xanana Konkorda Nomeia Kuadru FRETILIN Sira bá Embaixadór

Lú Olo hato’o deklarasaun ne’e bainhira jornalista sira husu kona-bá polítika Prezidente Repúblika José Ramos-Horta hodi nomeia kuadru Partidu FRETILIN balun bá iha Embaixadór foun Timor-Leste ne’ebé sei bá hala’o misaun diplomátika hodi reprezenta estadu Timor-Leste iha nasaun seluk.

Prezidente Partidu FRETILIN, Francisco Guterres “Lú Olo”. Foto/Dok. Hatutan.com

“Bom, kona-bá nomeasaun kuadru FRETILIN nian bá iha Embaixadór ne’e Prezidente Repúblika José Ramos-Horta nian hanoin, maibé ami hanesan FRETILIN seidauk simu direita buat ruma  husi Prezidente Repúblika. Kuandu ami asesu direita ho Prezidente Repúblika, hatete mai ami, naturalmente ami sei  iha liafuan hodi hateten bá nia,” Francisco Guterres Lú Olo hateten iha konferénsia  imprensa ne’ebé hala’o iha Komite Sentral FRETILIN (CCF), Comoro, Díli, Segunda (11/09/2023).

Lú Olo argumenta FRETILIN nafatin hein no nakloke ba komunikasaun ho Estadu no Governu atu bele kontribui bá dezenvolvimentu iha Timor-Leste.

“Ami sei hein Prezidente Repúblika bainhira  maka hato’o pedidu mai hodi dehan katak ami atu partisipa  iha ne’ebá, no to’o iha ne’e ami sei iha lia-fuan para atu ko’alia,” Lú Olo fundamenta tan.

Membru Parlamentu Nasionál (PN) hosi Bankada FRETILIN, David Dias Ximenes “Mandati” hateten nu’udár kuadru FRETILIN seidauk rona komunikadu ruma husi diresaun partidu dehan katak kuadru FRETILIN nian balun atu asume pozisaun nu’udár Embaixadór.

“Ha’u atu dehan de’it, katak sira nu’udár sidadaun, iha direitu atu asume kargu bá pozisaun saída, tamba ne’e sira nia direitu tomak nu’udár sidadaun, maibé karik hanesan kuadru FRETILIN ka militante FRETILIN kabe bá sira nia konsiénsia konsulta ho diresaun bele ka labele, ida ne’e ita ko’alia ona kona-bá intermu organizasaun,” Mandati hateten.

Deputadu ne’e hatutan Bankada ne’e mos hanesan militante FRETILIN nian ne’ebé diresaun koloka iha ne’e no sira ne’ebé karik hetan mós nomeasaun ba Embaixadór sira sei nu’udár kuadru FRETILIN ne’ebé embora governu mak koloka maibé ho konsentimentu ho diresaun nian.

“Tamba ne’e presiza separa nu’udár kuadru militante no mós nu’udár sidadaun, maibé diresaun mak sei determina tamba hotu-hotu iha diresaun nia laran no organizasaun ida iha nia estrutura no ko’alia kona-bá estrutura automatikamente iha kuadru superior, médiu, inferiores no iha mós militante,” Mantati subliña.

Nia argumenta kona-bá politika ida ne’ebé Prezidente Repúblika José Ramos-Horta ho Primeiru-Ministru Kay Rala Xanana Gusmão aplika ne’e tamba haree bá sidadaun sira ne’e nia koñesimentu ne’ebé nesesáriu para atu tulun dezenvolvimentu iha país ne’e.

Informasaun ne’ebé Hatutan.com asesu katak kuadru FRETILIN nian na’in-tolu ne’ebé sei nomeia bá kargu embaixadór mak hanesan; Alex Tilman nomeia  hanesan embaixadór Timor-Leste nian  bá Singapura,  Lukenu Alkatiri hanesan Embaixadór bá Tailándia ho Adaljiza Albertina Xavier Reis Magno nomeia nu’udár Embaixadora bá Nova Zelándia.

Jornalista: Vito Salvadór