Hatutan.com, (15 Setembru 2023), Díli- Prezidente Repúblika (PR), José Ramos-Horta, Sesta (15/09/2023), halo viajen Estadu nian bá Nova Iorke hodi partisipa iha Asemleia  Jerál Organizasaun Nasoins Unidas (ONU) bá dala-LXXVIII.

Lee Mós: Ramos-Horta Simu Karta Kredensiál husi Embaixadór Nasaun-Neen ne’ebé Rezidente iha Jakarta

PR José Ramos-Horta ho aviaun Aero Dili iha nia vizita bá Nova Iorke, Sesta (15/09/2023). Foto/Elio dos Santos da Costa

Iha asembleia jerál ONU nian ne’e, Ramos-Horta sei fahe ho nasaun membru ONU nian sira kona-bá progresu ne’ebé Timor-Leste atinje ona iha dezenvolvimentu polítiku no ekonómiku iha tinan hirak ikus ne’e.

Komunikadu imprensa hosi Palásiu Prezidensiál  ne’ebé Hatuta.com asesu relata katak  Prezidente Repúblika no Laureadu ba Prémiu Nobel da Pás, José Ramos-Horta, sei estadia iha Nova Iorke husi loron 17 to’o 23 fulan-Setembru 2023, atu reprezenta Timor-Leste no fó deklarasaun iha sesaun Asembleia Jerál ONU ba dala-LXXVIII ne’ebé sei realiza husi fulan-Setembru to’o Dezembru 2023.

Prezidente Timor-Leste sei fó deklarasaun nasionál iha Debate Jerál Asemleia  Jerál ONU nian ne’e iha loron 21 fulan-Setembru 2023, atu fahe progresu ne’ebé Timor-Leste atinje ona iha dezenvolvimentu polítiku no ekonómiku iha tinan hirak ikus ne’e.

Xefe Estadu Timor-Leste ne’e mós sei partisipa iha diálogu kona-bá Dezenvolvimentu Sustentavel ho tema “Halo Reziliénsia no La husik Ema ida iha kotuk.”

Prezidente José Ramos-Horta mós marka prezensa iha resepsaun ida-ne’ebé organiza husi Prezidente Estadus Unidus Amérika, Jose Robinette Biden Jr.

Prezidente Repúblika José Ramos-Horta sei hato’o mos diskursu importante ida kona-ba “Investimentu iha Seguransa Ai-han: Solusaun inovativu sira atu rezolve Krize Hamlaha,” iha Sede Nasoins Unidas nian.

Tuir ajenda ne’ebé iha katak PR Ramos-Horta mós sei partisipa iha eventu ida-ne’ebé organiza husi Misaun Tailándia kona-ba “Promove Parseria ba ita-nia futuru komún: Haforsa Parseria Multi-Stakeholder bá Aselera ODS iha ASEAN, no iha Organizasaun Mundiál Saúde (OMS) organiza konferénsia kona-ba “Prevensaun no Kontrola Moras La Komunikavel.”

PR José Ramos-Horta halo vizita Estadu bá Nova Iorke, Sesta (15/09/2023). Foto/Elio dos Santos da Costa

Prezidente sei partisipa iha Eventu Paralel Nivel Aas kona-bá Reforsa Solidariedade Global, Hametin Dame no Konstrui Reziliénsia iha País sira ne’ebé afetu husi konflitu no frajilidade, ne’ebé organiza husi g7+, iha loron 22 fulan-Setembru 2023. Eventu ne’e organiza hamutuk husi Timor-Leste no Sierra Leoa, ne’ebé mak nu’udar Prezidente g7+ atuál.

Xefe Estadu  Timor-Leste mós sei partisipa iha eventu paralela ne’ebé organiza husi Millennium Corporation Challenge kona-bá Investimentu ho Impaktu Boot. Timor-Leste sai hanesan benefisiáriu ida husi fundu MCC.

Iha Jullu 2022, Timor-Leste no Estadus Unidus Amérika liuhosi Millennium Corporation Challenge asina akordu Kompakta. Estadus Unidus fó millaun $420 (subvensaun) bá Timor-Leste bá programa rua: Programa kona-bá Tratamentu Bee-fo’er no Drainasaun no Programa Edukasaun ba Edukadór Ensinu Sekundáriu.” Tenik komunikadu ne’e.

Liu husi eventu paralela sira ne’e, xefe estadu sei hala’o reuniaun bilaterál no multilaterál. No Xefe Estadu sei finaliza atividade nivel aas iha Nova Iorke iha loron 24 fulan-Setembru 2023.

Jornalista: Vito Salvadór