Hatutan.com, (27 Setembru 2023), Díli– Konsellu Ministrus ne’ebé lidera hosi Primeiru-Ministru (PM), Xanana Gusmão, Kuarta (27/09/2023), aprova projetu rezolusaun ida hodi reativa membru Polísia Nasional Timor-Leste (PNTL) k na’in-158 ne’ebé reformadu atu hala’o fila-fali funsaun polisiál iha instituisaun seguransa.

Lee Mós: Membru PNTL Na’in-158 Reforma, Governu Konsidera Hanesan Tranzisaun Jerasionál

Serimónia despedida ne’ebé organiza hosi Komandu PNTL bá membru na’in-158, ho idade kompleta ona tinan 60 atu fila ona bá vída sivíl, iha Sentru Formasaun Polísia nian (CFP-Sigla Português), iha Comoro, Díli, Sesta (16/06/2023). Foto/Elio dos Santos da Costa.

“Konsellu Ministrus hala’o sorumutuk iha Palásiu Governu, Díli, no aprova ona projetu Rezolusaun Governu, ne’ebé aprezenta husi Ministru Interiór, Francisco da Costa Guterres, ba reintegrasaun pesoál ho funsaun polisiál sira hosi Polísia Nasionál Timor-Leste,” sita iha komunikadu imprensa ne’ebé Hatutan.com asesu.

Aprovasaun bá projetu rezolusaun ida-ne’e ho hanoin katak dignifikasaun sentidu servisu hosi PNTL importante tebetebes bá funsionamentu efikás no bá manutensaun konfiansa hosi públiku iha instituisaun ne’e, bá fortalesimentu morál no komprometimentu hosi polisiál, ne’ebé pozitivamente influensia kualidade servisu ne’ebé sira fó bá komunidade.

Diploma ida-ne’e hakarak atu rezolve kestaun pasájen bá situasaun aprozentasaun polísia PNTL na’in-158 nian ne’ebé halo ona durante Governasaun anteriór liuhosi prosedimentu ida ne’ebé hetan ona marka ho irregularidade oin-oin.

Governu reintegra fila-fali membru PNTL hirak ne’e no fó fali kompensasaun bá sira-nia tempu ne’ebé durante sira hala’o iha tempu apozentasaun, ne’ebé tuir ho sira-nia montante remunerasaun baze mensál no suplementu remuneratóriu sira ne’ebé sira tenke hetan bainhira sira seidauk tama bá situasaun reforma, ho deskontu bá montante ne’ebé benefisiárius kompensasaun simu hanesan pensaun ferik-katuas nian.

Períodu tempu iha ne’ebé profisionál, sira-ne’e mantein iha situasaun apozentasaun nian maka konta hanesan fó ona estadu ativu bá efeitu remunerasaun, férias, progresaun, promosaun no apozentasaun.

Iha loron 01 fulan-Juñu 2023, Komandu PNTL hamutuk ho VII Governu Konstitusionál reprezenta hosi Ministru Prezidénsia no Konsellu Ministru, Fidelis Manuel Leite Magalhães halo ona despedida ho membru na’in-158, no hahú hosi loron 01 fulan-Jullu, ofisialmente la ativa ona hanesan membru polísia, maibé fila ona bá vida sivíl. Seremónia ne’e rasik hala’o iha Akademia Polísia ka Sentru Formasaun Polísia (CFP-Sigla Português), Comoro, Díli.

Tuir estatutu PNTL, Dekretu-Lei númeru 69/2022, artigu 128, sita katak, ofisiál PNTL ne’ebé pasájen bá aprezentasaun maka sira ne’ebé to’o ona tinan 60, tuir a-linea (a), no julgadu katak, Fizikamente no Psíkikamente, la konsege atu ezerse nia funsaun iha PNTL, tuir aliena (b).

Iha sorin seluk, artigu 129, a-linea (a), katak, ofisiais ne’ebé responsável bá iha jestaun rekursu umanu, tinan-tinan to’o iha loron 30 fulan-Novembru, tenke aprezenta lista bá komandante jerál.

Iha loron 22 fulan-Marsu 2023, Ofísiu ida hosi Gabinéte Ministru Interior, VIII Governu Konstitusionál nian, fó resposta bá karta hosi Gabinéte Komandante jerál PNTL, ho númeru Ofísiu 99/CG-PNTL/43/2023, loron 07 fulan-Marsu 2023, Solisíta informasaun kona-bá lista 158 ne’ebé tama bá iha reforma, atu kompleta ho tempu servisu kada postu (deviza), no kada membru, inklui vensimentu totál kada postu (deviza) no saláriu désimu-teriseiru ninian.

Maske nune’e, iha mandatu IX Governu Konstitusionál, liuhosi ministru interior, Francisco Guterres, haree katak, reforma ne’e sala tanba la tuir Lei no Governu atuál haree katak iha mós vakum ka kauza ne’ebé prejudika bá iha reforma ne’e.

Jornalista: Rogério Pereira Cárceres