Hatutan.com, (07 Novembru 2023), Díli– Komisaun Reguladór Arte-Marsiál (KRAM) hein desizaun Governu nian bainhira taka atividade grupu arte-marsiál (GAM) ho grupu arte-rituál (GAR).

Lee Mós: Insidente Lourba Halo Xanana Hirus no Posivel Taka Atividade GAM ho GAR

Prezidente KRAM, Octávio da Conceição. Foto/Dok.Hatutan.com

Foin lalais ne’e, Primeiru-Ministru (PM), Kay Rala Xanana Gusmão, deklara katak iha reuniaun Konsellu Ministru sira-nian, Kuarta  (08/11/2023), sei ko’alia posibilidade taka atividade GAM ho GAR ne’ebé kontinua kria provokasaun no hata’uk povu.

PM Xanana Gusmão hato’o afirmasaun ne’e relasiona mós ho kazu atake malu entre grupu arte-marsiál ho arte-rituál ne’ebé akontese iha Baucau (Gariuai), Viqueque, Díli no Bobonaro (Carabau ho Lourba) iha ámbitu loron Finadu 01-03 fulan-Novembru ne’e.

Prezidente KRAM, Octavio da Conceição, esplika KRAM hanesan instituisaun Governu nian ne’ebé estabelese iha tinan 2009 ho lei númeru 10/2008 ne’ebé revoga fali ba lei númeru 6/2017, tanba ne’e hanesan instituisaun Governu nian ezekuta desizaun hotu-hotu ne’ebé liga ho Governu nian.

“Kona-bá taka atividade GAM ho GAR ne’e kompeténsia Governu liuhosi Konsellu Ministru sira-nian para atu halo desizaun,” Octavio da Conceição, hateten bá Hatutan.com, iha arredores UNPAZ, Tersa (07/11/2023).

Nia afirma, bainhira taka, atu garantia problema kontinua mosu ka la mosu ne’e nia laiha komentáriu, KRAM nia kompeténsia maka ezekuta de’it desizaun Governu nian.

Bankada FRETILIN ho CNRT Nia Opiniaun

Membru PN, David Dias “Mandati”. Foto/Elio dos Santos da Costa

Membru Bankada FRETILIN iha Parlamentu Nasionál (PN), Deputadu David Dias Ximenes “Mandati” hateten, IX Governu nian  planu atu taka atividade GAM ho GAR sei la rezolve problema iha rai-laran.

“Agora ha’u husu uluk taka rezolve problema ka lae?  uluk taka la rezolve problema tán ne’e maka loke fali agora atu taka fali, buka took meius seluk aumenta Ofisiál Polísia Suku (OPS) iha suku la bele OPS ne’e ida de’it ema mós iha feen no oan ida de’it ne’e servisu halo nusa? mínimu na’in tolu para ida servisu ida standby no ida deskansa no mós servisu iha suku nian tenke funsiona no sira tenke iha baze dadus ranting arte-marsiál iha suku laran,” Deputada David Dias Ximenes hateten  bá jornalista sira iha PN, Segunda (06/11/2023).

Deputadu David Dias Ximenes hateten, sé de’it maka halo problema tenke kaer no kastigu tuir lei ne’ebé maka iha.

Membru PN hosi Bankada CNRT,  Natalino dos Santos hateten ho triste haree situasaun krime ne’ebé akontese no envolve membru GAM ho GAR sira.

“Triste tebes haree situasaun ida-ne’e halo ita hanoin barak no ema barak lamenta tebes ho konfrontu iha fatin-fatin,” Deputadu Natalino dos Santos hateten.

Deputadu CNRT, Natalino dos Santos hateten, kona-bá atu arte-marsiál ne’e kompeténsia Governu nian no sei foti medida ruma hodi solusiona bá situasaun refere.

Deputadu  Natalino dos Santos haree arte-marsiál sira ne’ebé nian karakter konfrontativu bele limita no taka, mais sira ne’ebé maka karakter desportiva hanesan Taekwondo, Karate, Kempo no Aekido ne’e laiha problema.

Jornalista: Gloria Maia/ Zita Menezes