Hatutan.com, (20 Novembru 2023), Díli-Delegasaun empreza internasionál Tsuneishi Shipbuilding, Co.Ltd,  hosi Japaun, Segunda (20/11/2023), hasoru malu ho Primeiru-Ministru (PM), Xanana Gusmão, hodi hato’o sira-nia prontidaun atu harii estaleiru naval ida iha Timor-Leste.

Lee Mós: Japaun Apoia Reabilita Irrigasaun Lubuto ho Millaun $8

Delegasaun emprezáriu internasionál hosi empreza Tsuneishi Shipbuilding Com.Ltd hasoru malu ho PM Xanana akompaña hosi Embaixadór Japaun nian mai Timor-Leste, Tetsuya Kimura.

PM Xanana hala’o enkontru ho delegasaun hosi kompañia internasionál, Tsuneishi Shipbuilding Co.Ltda, ne’ebé akompaña hosi Embaixadór Japaun mai Timor-Leste, Tetsuya Kimura, Segunda (20/11/2023). Foto/ Espesiál

“Embaixadór mai ho kompañia hosi Japaun, sira hakarak atu loke fatin ida atu halo ró. Ró ne’ebé boot, boot tebtebes, oioin, ne’ebé, sira buka helafatin. Sira haree ona fatin rua ka tolu iha sorin ne’ebá. Maibé, sira sei haree didi’ak fali rai ne’e bele tahan ka lae, tasi kle’an ne’e nusá, ne’ebé, ohin sira mai aprezenta aan,” Primeiru-Ministru, Kay Rala Xanana Gusmão, informa bá jornalista sira, hafoin sorumutu iha Gabinéte das Fronteiras Marítimas, Palásiu Governu, Díli.

Kompañia sira sei bá halo tán estudu hodi haree didi’ak fatin, depois maka sei ko’alia ho Governu atu bele fó lisensa bá sira hodi halo sira-nia fábrika, hodi halo ró ho tipu oioin.

Fatin sira ne’ebé kompañia ne’e identikadu maka hanesan iha área tasi-ibun Munisípiu Manatuto, iha mós Postu Administrativu Laleia nian. Maibé, ida ne’e mós hosi tékniku sira kompañia ne’e nian sei bá halo lai estudu viabilidade, hafoin hahú nia implementasaun.

Embaixadór Japaun mai Timor-Leste, Tetsuya Kimura, hatutan, nia ho reprezentante kompañia ne’ebé mai atu harii estaleiru iha Timor-Leste. Kompañia Tsuneishi nia lokalizasaun iha fatin ida besik Sidade Hirosima iha rai Japaun.

Embaixadór Tetsuya Kimura, informa katak, delegasaun sira kompañia ne’e nian, sira mai tiha ona TL iha fulan-Agostu, foin lalais, no sira mai tán ida ne’e, atu haree fatin sira ne’ebé merese atu sira bele halo sira-nian investimentu bá estaleiru nian.

“Sira mai ho ha’u, atu hasoru ho  primeiru-ministru, atu troka opiniaun depois atu fó hanesan informasaun ikus, update nian, sobre saida mak sira hetan tiha ona iha fatin ne’ebá, depois sira mós husu apoiu hosi Governu bá sira nian investimentu,” nia esplika.

Hatán kona-bá to’o bainhira mak kompañia sei kompleta estudu viabilidade ida ne’e, Embaixadór Tetsuya Kimura, dehan, iha momentu ida ne’e, sira seidauk bele hateten kona-bá to’o bainhira maka konklui estudu viabilidade ne’e.

Jornalista: Rogério Pereira Cárceres