Hatutan.com, (06 Fevereiru 2024), Díli – Komisaun Anti Korrupsaun (CAC, sigla portugés)  halibur daudaun informasaun relevante sira relasiona ho projetu 15 ho intensaun adjudikasaun direta ne’ebé hala’o iha Eletrisidade Timor-Leste, Empreza Públiku (EDTL,E.P).

Lee Mós: Adjudikasaun Direta bá Projetu 15 iha EDTL,E.P, Júlio Gonçalves Dezmente no Konsidera Laiha Prátika Korrupsaun-Nepotizmu

Edífisiu EDTL,E.P iha Caicoli, Díli. Foto/Elio dos Santos da Costa

Diretor Investigasaun CAC, José Verdial  hateten, liga ho adjudikasaun direita ne’e lei aprovizionamentu mós hatete klaru no fó dalan mós atu halo adjudikasaun direita, maibé depende de’it bá nia prosesu ne’e saida. Sira atu tuir adjudikasaun direita mós tenkeser preinxe rekizitu sira ne’ebé mak iha tanba la’ós projetu hotu-hotu bele halo adjudikasaun direita, nune’e ho konfisoins balu hatete dehan iha  asaun ruma atu halo adjudikasaun direita entaun sira bele halo adjudikasaun direita.

“Ami seidauk iha informasaun kona-bá ida ne’e, foin mak hare ita-boot sira nia notísia. Halibur hela informasaun sira-ne’e, mas kona-bá ninia prosesu sira atu tuir ka la tuir ne’e so parte hosi EDTL,E.P mak hatene,” Diretór Investigasaun CAC Jose Verdial hatete bá Hatutan.com  iha edifísiu CAC, Farol, Díli, Tersa  (06/02/2024).

Nia esplika tan, kualkér projetu ho valor orsamentu hira ne’e depende mas agora ho parte CAC ninia kompeténsia mak halo prevensaun no investigasaun bá iha krime korrupsaun sira iha Timor-Leste Leste tomak. Tanba ne’e, kona-ba kontextu sira hanesan ne’e tenke haree lai.

Diretór Investigasaun CAC José Verdial hatutan, seidauk iha informasaun ka keixa ruma tama mai iha CAC katak iha prosesu adjudikasaun direita ne’ebé mak EDTL, E.P halo la tuir dalan legal ne’ebé vigora, tanba ne’e mak iha mak foin bele halibur informasaun sira depois mak análize fila fali hodi halo averiguasaun atu bele hatene iha indísiu ruma bá korrupsaun ka lae.

Diretór Investigasaun CAC José Verdial. Foto/Tome da Silva

Karik iha prosesu averiguasaun halo ona mak iha indísiu ba korrupsaun, nia afirma, CAC iha knaar no obrigasaun hodi halo auto partisipasaun no haruka ba Ministériu Públiku.

Durante bá prosesu hirak ne’ebé mak  EDTL, E.P halo ne’e CAC rasik seidauk iha averiguasaun ruma ba iha ne’ebá tanba foin haree informasaun sira ne’e.

“Hosi informasaun sira ne’e mak ami-nia investigadór sira sei haree took kestaun sira ne’e, depois mak haree katak karik iha posibilidade ba indísiu ruma mak halo averiguasaun hodi bele iha serteza kona bá ida-ne’e,” José Verdial hateten.

Agora daudaun CAC se haree no análize informasaun sira ne’e karik haree mak iha nesesáriu duni no kabe bá kompeténsia CAC nian ka lae karik kabe kompeténsia bá CAC nian mak CAC halo rejista, karik rejista ona mak foin hahú halo averiguasaun tanba ne’e mak atu bainhira mak halo averiguasaun ne’e seidauk tanba foin iha informasaun.

“Kualkér servisu ne’ebé mak ema halo ita fiar katak sempre iha nia razaun ho konfisoins sira ne’ebé mak iha  tan ne’e mak ita labele halo analojia katak sira halo adjudikasaun direita ne’e iha indísiu bá korrupsaun ne’e la bele. Maibé buat hotu-hotu iha nia prosesu no ita sei buka hatene tanba saida mak iha adjudikasaun direita no prienxe rekizitu lei aprovizionamentu ka lae agora ha’u labele dehan lai iha irregularidade ruma, maibé presiza iha informasaun mak foin bele hatete buat ruma ba ida ne’e,” nia dehan tan.

Lee Mós: Projetu 15 iha EDTL,E.P Halo ho Adjudikasaun Direta Deskonfia iha Pratika Korrupsaun no Nepotizmu

Jornalista Estajiáriu: Lazaro Pereira Quefi