Hatutan.com, (11 Marsu 2024), Díli- Vise-Primeiru Ministru no Ministru Koordenadór Asuntu Sosiál ho Ministru Dezenvolvimentu Rural no Abitasaun Komunitáriu, Mariano Assanami Sabino, hateten iha tempu badak Governu sei aprezenta lei Abitasaun Komunitária molok implementa uma dignu bá povu.

Lee Mós: Governu Sei Harii Uma Dignu 50 bá Komunidade Aubeon ho Orsamentu kada Uma $40,000.00

Vise-Primeiru Ministru no Ministru Koordenadór Asuntu Sosiál ho Ministru Dezenvolvimentu Rural no Abitasaun Komunitáriu, Mariano Assanami Sabino. Foto/Elio dos Santos da Costa

Vise-Primeiru Mariano Assanami Sabino bá jornalista sira iha Pantai Kelapa ,Díli,  Segunda (11/03/2024) hateten, prosesu konstrusaun  uma dignu bá povu ne’e tamba tenke da’et bá Ajénsia Dezenvolvimentu Nasionál (ADN) no mós bá Ministériu Obras Públikas (MOP) sira-nia servisu para sira halo didi’ak no bainhira tama ona bá prokurasaun maka sei prosesa bá tenderizasaun ka konkursu públiku  para depois bele hahú halo ona.

“Levantamentu fatin foun lubuk ida mais ida ne’e ita sei hein para depois atu bele aprezenta, tamba uma dignu ne’e rasik iha tempu badak sei aprezenta lei bá Abitasaun ne’ebé regula bá  Abitasaun Komunitária, Sosial, Komersiál, subsidiariu no mós Abitasaun ne’ebé mos regula bá uma estadu sira, tanba ne’e, presiza iha lei para regula,” Mariano Assanami Sabino hateten.

Antes ne’e, Vise-Primeiru Ministru no Ministru Koordenadór Asuntu Sosiál ho Ministru Dezenvolvimentu Rural no Abitasaun Komunitáriu, Mariano Assanami Sabino, kompromete harii uma dignu unidade 50 bá komunidade Suku Aubeon, Postu Administrativu Barieque, Munisípiu Manatuto.

Mariano Assanami Sabino hateten, konstrusaun bá uma dignu hamutuk 50 ne’e parte ida hosi polítika no programa bá Dezenvolvimentu Rurál no Abitasaun Komunitáriu ho orsamentu bá kada uma $40,000.00.

“Programa ho uma hanesan sei halo mós iha Tunubibi, Munisípiu Bobonaro, ho uma dignu unidade 40.” Vise-Primeiru Ministru no  no Ministru Koordenadór Asuntu Sosiál ho Ministru Dezenvolvimentu Rural no Abitasaun Komunitáriu, Mariano Assanami Sabino hato’o lia hirak ne’e  iha ámbitu diálogu ho komunidade  Suku Aubeon, Postu Administrativu Barique, Munsípiu Manatuto, Segunda 12 fulan-Feverieru 2024.

“Ita iha ona dezenvolvimentu lubuk ida mai kraik hanesan edukasaun, saúde, bee-moos no estrada rurál. Iha Abitasaun ne’ebé mak antigamente halo ne’e hotu bá agrikultura, ne’ebé ita hanoin katak dezenvolvimentu rurál ninia objetivu prinsipál mak  oinsá atu mobiliza, integra mak povu tenke moris di’ak ho sivilizadu no demokrátiku,” Mariano Assanami Sabino hateten.

Jornalista: Vito Salvadór