Hatutan.com, (06 Jullu 2024), Díli- Prezidente Repúblika (PR), José Ramos-Horta liu husi Gabinete Apoiu Sosiedade Sivíl, kontinua fó apoiu sosiál ba komunidade vulneravel inklui oferese material konstrusaun uma nian ba komunidade bairru Akrema, Aldeia Uaru-ana, Suku Biqueli, Munisípiu Ataúro.

Lee Mós: Ramos-Horta Ezije Nasaun Dezenvolvidu Sira Apoiu Finanseiru Sustentável bá Fundu Mudansa Klimátika

Apoiu nesesidade bazika bá komunidade Akrema-Ataúro. Foto/Mídia GPR

Asesór servisu Sosiedade Sivíl no Asuntu Sosiál Prezidénsia Repúblika (SSAS-PR), Quintiliano Moníz Carvalho, hateten tuir orientasaun no aprovasaun husi Prezidente Repúblika, José Ramos-Horta, oferese materiál konstrusaun bá família Fernando Belo no oferese mos nesesidade bázika ba família vulneravel uma-kain 30 inklui roupa bá labarik no jaket salva vida iha tasi-laran bá peskadór sira.

Família Fernando Belo hetan apoiu materiál konstrusaun husi Xefe Estadu, tamba  Fernando ho idade 60 resin ne’e husu tulun liu husi Asesór SSAS-PR atu Prezidente Repúblika bele hadi’a nia uma, ne’ebé ho kondisaun grave, liu-liu iha tempu udan.

Iha família ne’e, iha mós bebe ho idade menus husi tinan tolu. Hafoin hato’o bá Xefe Estadu, hetan kedas aprovasaun ba apoiu ne’ebé husu.

“Apoiu ne’e Prezidente Repúblika mak fó ba komunidade sira ne’ebé presiza liu, tamba ne’e, ohin, ita mai fahe ba sira,” Quintiliano Moníz Carvalho iha komunikadu ba imprensa ne’ebé Hatutan.com asesu, Sábadu (06/07/2024).

Reprezentante autoridade lokál Suku Biqueli, Nadab Correia, agradese bá tulun Xefe Estadu José Ramos-Horta hodi  bele tulun nia populasaun.

Prezidensia Repúblika apoiu materiál konstrusaun uma nian bá abitante Fernando Belo iha Akrema-Ataúro, Sábadu (06/07/2024). Foto/Mídia GPR

“Komunidade ne’e enfrenta duni uma-aat, terus liu bainhira tempu udan. Nune’e prezensa husi Prezidénsia Repúblika nian, ami kontente no agradese ho tulun ne’ebé iha ba ami nia komunidade,” Nadab Correia hateten.

Bairru Akrema totál abitante 162 no lokaliza iha área poténsia ba turizmu maibé área ida izoladu, la asesu ba bee-moos, eletrisidade inklui telekomunikasaun.

Ajudu ne’ebé Prezidente Repúblika oferese liuhusi Servisu SSAS-PR mak, ekipamentu konstrusaun uma ba família vulneravel mak hanesan simente kaut 50, Kalén tahan 80, Ai ba halo uma hamutuk lolon 30, rai-henek iha kamioneta ida, inklui oferese ai-han báziku hanesan foos no mina ba te’in ba uma-kain vulneravel hamutuk 30 no roupa ba labarik no jaket salva vida iha tasi nian, hamutuk 50 ba peskadór sira.

Jornalista : Vito Salvadór