Hatutan.com, (31 Dezembru 2024), Díli-Komemorasaun Loron Erói Nasionál bá dala-7, 31 Dezembru 2024, maiória líder nasionál sira la partisipa, liu-liu Komandante ein-Xefe FALINTIL atuál Primeiru-Ministru (PM), Xanana Gusmão,  Prezidente Repúblika (PR), José Ramos-Horta, ho mós Primeiru-Ministru VIII Governu Konstitusionál, Taur Matan Ruak.

Lee Mós: Komemora Loron Erói Nasionál Nu’udár Tempu Halo Reflesaun

Prezidente partidu FRETILIN, Francisco Guterres “Lú-Olo” presta omenajen ba martir no eroi libartasaun nasionál iha loron eroi nasional, 31 Dezembru 2024. Foto/Rogério Pereira Cárceres

Líder nasionál sira ne’ebé partisipa iha eventu komemorasaun ne’e mak Prezidente no Sekretáriu jerál FRETILIN, Francisco Guterres “Lú-Olo” ho Marí Amude Alkatiri, iha ne’ebé nu’udár fundadór nasaun ne’e nian, inklui membru governu sira IX Governu Konstitusionál nian balu.

Ministru bá Asuntu Kombatente no Libertasaun Nasionál, Gil da Costa Monteiro “Oan-Soru”, informa, PR Ramos-Horta labele partisipa iha seremónia ne’e tanba razaun saúde, maibé kona-bá PM Xanana,  Oan-Soru labele fó komentáriu, tanba ne’e sira-nian xefe governu.

“Prezidente Repúblika aujénsia tanba bá tratamentu saúde. Nai sai iha sesta-feira, nia sei fila ora-oras tán. Agora, señor primeiru-ministru, nia poder ser iha atividade seluk, tanba ne’e ha’u nia xefe governu, ha’u labele koalia ida ne’ebá,” Ministru Gil Oan-Soru, esklarese bá Jornalista sira, hafoin seremónia nasionál ne’e iha Rotunda Prezidente Nicolau Lobato, Díli.

“Komemorasaun ne’e la’ós loron ohin de’it, maibé kada tinan. Komemorasaun ida-ne’e ita foti iha loron ne’ebé saudózu Nicolau nia mate, maibé, ida ne’e mak sai ona loron nasionál bá Eroi sira hotu, bá Mártires Libertasaun nasionál nian, feto ka mane, ki’ik ka boot, ne’ebé mate ho objetivu ida de’it, hakarak ukun-rasik aan,”  Gil Oan-Soru hateten.

Governante ne’e husu bá povu Timor tomak, bá sidadaun hothotu, atu halo reflesaun bá pasájen moruk ne’ebé ita-nia Aman no Abon sira liu, tanba sira hamriik metin, kumu-liman, tebe-rai, hodi reafirma katak, nasaun ne’e ki’ik, mais nia tenke ukun-rasik aan.

Kona-bá rekoñesimentu estadu nian bá luta na’in sira, Ministu Oan-Soru, dehan, rekoñesimentu ne’e tuir faze, la’ós governu borong de’it. Tanba sé governu fó rekoñesimentu borong de’it, ida ne’e bele kria fali problema ida bá nasaun rasik.

Alkatiri ho Lú-Olo Presta Omenájen

Prezidente partidu FRETILIN, Francisco Guterres “Lú-Olo” ho  Sekretáriu jerál FRETILIN, Marí Alkatiri, partisipa iha eventu komemorasaun ne’e tanba sira hanesan líder nasionál. Nune’e, komisaun organizadóra konvida mós sira na’in-rua  hamutuk ho lider sira seluk, inklui membru governu hotu, hakat bá simu ai-funan ne’ebé preparadu hosi komisaun ekipa komisaun organizadóra, hodi tau ai-funan iha Monumentu Saudózu Nicolau dos Reis Lobato nian iha Comoro-Dili.

“Ha’u la koalia. Saida mak ha’u hatete, ha’u hatete ona. Ha’u hakerek ona,” Alkatiri, hatán badak bá Jornalista sira bainhira husu nia kona-bá líder sira fó oin bá malu hodi dezenvolve di’ak liután Timor-Leste. 

Observasaun Hatutan.com iha terrenu, nota katak, komemorasaun loron nasionál ne’e partisipa mós hosi Juventude Rezisténsia sira, Korpu Diplomátiku sira, funsionáriu públiku sira, inklui populasaun balu iha Díli.

Iha eventu nasionál ne’e, governu hala’o ho programa sira mak hanesan, husu missa agradesimentu nian iha Igréja Motael no Kari Ai-funan iha Jardím dos Herois da Pátria, iha Metinaro, ne’ebé realiza tiha ona iha Kinta (30/12/2024).

Loron tuir mai kontínua ho atividade la’o-ain (marxa) hosi Palásiu Prezidénsiál nia oin no hakotu ho tau ai-funan iha estátua Saudózu Nicolau Lobato nian iha rotunda Comoro.

Komemorasaun Loron Erói Nasionál nian bá tinan ida ne’e, hala’o ho tema sentrál, “Ami Nia Mate…Sai Inspirasaun Bá Povu Timor-Leste Hodi Hakilar…A Luta Contínua, A Vitória é Certa, Resistir é Vencer, Viva Aos Herois da Pátria, Viva Povo Maubere, Viva Timor-Leste. Paz Fraternidade”.

Jornalista: Rogério Pereira Cárceres