Hatutan.com, (28 Jullu 2025), Díli–Primeiru-Ministru (PM), Kay Rala Xanana Gusmão, fó instrusaun ka orienta  Sekretáriu Estadu   Komunikasaun  Sosiál (SEKOMS), Expedito Dias Ximenes, hatán ka responde pergunta jornalista Hatutan.com relasiona ho projetu fornesimentu kombustivel no manutensaun karreta ba Rádiu Televizaun Timor-Leste, Empreza Publika (RTTL,E.P) ne’ebé deskonfia Prezidente Konsellu Administrasaun RTTL,E.P, Elizeu Isaac Fernandes, pratika favoritizmu, nepotizmu, hamosu prejuizu ba Estadu no viola Rejime Jurídiku Aprovizionamentu.

Lee Mós: AJAR-FONGTIL husu CAC ho IGE Investiga Prezidente RTTL,E.P

SEKOMS Expedito Dias Ximenes partisipa sorumutuk koordenasaun interministeriál daruak kona-bá preparativu adezaun TL ba ASEAN iha Salaun Nobre MNEK, Segunda (28/07/2025). Foto Repro/Média SEKOMS

Iha ámbitu enkontru ida iha edifísiu Ministériu Negósiu Estranjeiru  no Kooperasaun (MNEK), Segunda (28/07/2025), Hatutan.com halo esforsu atu halo entrevista ida ho SEKOMS Expedito Dias Ximenes relativa ho projetu sira ne’ebé la’o iha RTTL,E.P, maibé deskonfia SEKOMS tenta atu dezvia hodi la’o helik iha Primeiru-Ministru Kay Rala Xanana Gusmão nia sorin.

“Hei…hei…. hatán jornalista ne’e, atu entrevista ho ita (SEKOMS-red), bá  hatán, lalais,” PM Xanana Gusmão lia-tun ba SEKOMS Expedito Dias Ximenes hodi responde lalais pergunta  jornalista Hatutan.com nian.

Sekretáriu Estadu Expedito Dias Ximenes hateten ba projetu servisu fornesimentu kombustivel no servisu manutensaun karreta  RTTL,E.P iha RTTL,E.P nia autoridade resik atu deside la’ós SEKOMS.

“Ooooh, ne’e husu bá RTTL sira, tanba ami la hatente, ami  SEKOMS nein hatente buat ida, o (jornalista-red) arbiru de’it, RTTL ne’e iha nia autóridade  rasik atu deside, la’ós SEKOMS, ami nein tama pedasuk ida mós laiha, dala ida tan nein tama iha ne’ebá,” Expedito Dias Ximenes hateten.

Fó hanoin fali katak, Prezidente Konsellu Administrasaun Rádiu Televizaun Timor-Leste, Empreza Públiku (RTTL,E.P), Elizeu Isaac Fernandes, deskonfia halo abuzu podér no hamosu prejuízu ba Estadu iha foti desizaun ba projetu  servisu fornesimentu kombustivel ho servisu manutensaun karreta iha RTTL,E.P.

Prezidente Konsellu Administrasaun RTTL,E.P, Elizeu Isaac Fernandes, uza nia kompeténsia hodi hatún despaxu fó projetu servisu fornesimentu kombustivel ba kompañia Mãe da Graça Unipessoal, Lda  ho projetu servisu manutensaun karreta RTTL,E.P ba kompañia Festep, Unipessoal, Lda, ne’ebé la prienxe rekizitu iha selesaun dokumentu no aprezenta presu boot ka la razoavel.

Tuir dokumentu  relatóriu avaliasaun servisu fornesimentu kombustivel ho klasifikasaun importante no númeru referénsia 07/Ekipa Juri/RTTL,E.P/IV/2025 ne’ebe    Hatutan.com  asesu hatudu, katak ekipa juri ho nia kompozisaun hanesan Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru iha loron 25 fulan-Abríl 2025, deside  kompañia Aitula Fuel’s Unipessoal, Lda, mak manan na’in ba fornese kombustivel ba RTTL,E.P ho razaun presu razoavel no dokumentu ne’ebé kompañia submete kompletu tuir duni rekizitu ne’ebé RTTL,E.P mensiona.

Iha tabela avaliasaun dokumentu ba projetu servisu fornesimentu kombustivel ho nia kustu ka presu $40,000.00, hatudu kompañia Aitula Fuel’s Unipessoal, LD hetan valor selesaun dokumentu boot 130 no aprezenta montante orsamentu ki’ik $34,39.

Kompañia Mãe da Graça Unipessoal, Lda, ne’ebé prezidente  Konsellu Administrativu RTTL,E.P, Elizeu Isaac Fernandes, indika hodi manan fali servisu fornesimentu kombustivel ba RTTL,E.P ho kustu boot $35,78 no hetan valor iha avaliasaun dokumentu ki’ik 115 de’it.

Iha dokumentu karta akompañamentu ne’ebé Diretora Nasionál Administrasaun no Finansas RTTL,E.P, Noviana de Fátima Nahak, asina iha loron 29 fulan-Abríl 2025, hato’o ba Diretór Ezekutivu RTTL,E.P, João Guterres da Silva, reiteira tan katak bazeia ba rezultadu enkontru ekipa juri iha loron 25 fulan-Abríl 2025, hodi foti desizaun ba servisu fornesimentu kombustivel deside ba Aitula Fuel’s Unipessoal, Lda mak sai nu’udár manan na’in, ho razaun presu ne’ebé razoavel no dokumentu ne’ebé kompañia submete ho kompletu.

Iha fali loron 30 fulan-Abríl 2025, Diretór Ezekutivu RTTL,E.P, João Guterres da Silva, hato’o pedidu aprovasaun relatóriu avaliasaun servisu fornesimentu kombustivel ho númeru referénsia 31/D.E/RTTL,E.P/IV/2025, ba Prezidente Konsellu Administrasaun RTTL,E.P, Elizeu Isaac Fernandes,  atu aprova pedidu relatóriu avaliasaun servisu fornesimentu kombustivel.

Iha loron 13 fulan-Maiu 2025, Prezente Konsellu Administrasaun RTTL,E.P, Elizeu Isaac Fernandes,  hatún despaxu husu favor Diresaun Nasionál Administrasaun no Finansas (DNAF) trata asuntu ne’e fó oportunidade ba kompañia Mãe da Graça Unipessoal, Lda, ho razaun iha esperiénsia servisu hamutuk ne’ebé ho kometimentu ba servisu kualkér tempu.

Iha loron hanesan Diretóra Nasionál Administrasaun no Finansas RTTL,E.P, Noviana de Fátima Nahak, hakerek no asina mós despaxu  hodi husu ba Departamentu Aprovizionamentu prosesa pedidu ida-ne’e tuir despaxu Prezidente  no regra rejime aprovizionamentu. 

Iha fali dokumentu seluk kona-bá servisu fornesimentu manutensaun karreta RTTL,E.P nian ho montante orsamentu $20,000.00, ekipa juri ho nia kompozisaun  juri mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru hodi foti desizaun ba servisu fornesimentu manutensaun ba karreta  deside ba kompañia Fe Loog Unipessoal, Lda hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete ho kompletu tuir rekiziti ne’ebé RTTL,E.P husu.

Iha avaliasaun dokumentu ba projetu fornesimentu manutensaun ba karreta RTTL,E.P, kompañia Fe Loog Unipessoal, Lda hetan valor boot 130 no kompañia Fastep, Lda ne’ebé Prezidente RTTL,E.P Elizeu Isaac Fernandes, indika hetan de’it valor 110 tanba rekizitu sira hanesan TIN laiha no estatutu kompañia nian laiha.

Iha loron 29 fulan-Abríl 2025, Diretora Nasionál Administrasaun no Finansas RTTL,E.P, Noviana de Fátima Nahak submete karta akompañamentu ba Diretór Ezekutivu RTTL,E.P, João Guterres da Silva, ho númeru referénsia 98/DNAF-RTTL,EP/IV/2025, hodi solisita ba Diretór Ezekutivu RTTL,E.P, João Guterres da Silva,  atu bele hetan aprovasaun ba relatóriu ida ne’ebé ekipa juri deside kompañia Fe Loog Unipessoal, Lda maka manan hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete kompletu.

Iha loron 13 fulan-Maiu 2025, prezidente RTTL,E.P, Elizeu Isaac Fernandes hatún despaxu husu favor ba DNAF atu trata asuntu ne’e no fó oportunidade ba kompañia Fastep Unipessoal, Lda tanba bazeia ba esperiénsia servisu hamutuk  ne’ebé profisionál no prontu ba RTTL (……)

Iha loron hanesan Diretora DNAF RTTL,E.P, Noviana de Fátima Nahak hatun no  asina mós despaxu  hodi husu ba Departamentu Aprovizionamentu prosesa pedidu ida-ne’e tuir despaxu prezidente Konsellu Administrasaun (CA, sigla portugés) RTTL,E.P.

Jornalista: Marcelino Tomae