Hatutan.com, (11 Jullu 2022), Díli—Embaixadór Xina iha Timor-Leste (TL) husu ba Ministériu Justisa (MJ) atu aselera hodi finaliza akordu kooperasaun iha área justisa nune’e bele fasilita Timor-oan ba eskola iha área Direitu iha Macau, tanba antes ne’e iha Governu anteriór seidauk aprezenta ba Konsellu Ministru (KM).

Preokupasaun ne’e hato’o bainhira Embaixadór Xina Xiao Jianguo hala’o enkontru ho Ministru Justisa, Tiago Amaral Sarmento iha Gabinete Ministériu Justisa.

Lee Mós: PM Taur Agradese Apoiu Ne’ebé Durante Ne’e Xina Oferese ba TL

“Embaixador hala’o reuniaun ho ha’u kona-bá akordu ne’ebé uluk inisia ona iha 2009, maibé to’o agora seidauk finaliza. Akordu ne’e ko’alia kona-bá kooperasaun TL ho Xinezas iha Macao ne’ebé iha oportunidade ba Timoroan ba eskola iha área diretu no formasaun iha área justisa. Akordu kooperasaun ne’e to’o ohin loron seidauk finaliza, tanba iha altura ne’eba Governu anteriór seidauk aprezenta iha Konsellu Ministru,” Tiago Amaral Sarmento hateten hafoin enkontru iha Gabinete MJ, Segunda (11/07/2022).

Tanba ne’e, parte MJ sei halo diskusaun, karik akordu ne’e laiha violasaun ruma ba lei inan RDTL maka bele avansa, tanba iha artigu balun iha akordu nia laran presiza haree didi’ak.

Jornalista: Carmelita Isaac