Hatutan.com, (18 setembru 2021), Díli-Sarani sira pertense ba Parókia São José Operáriu, Aimutin, Díli, la konsente asiste konstrusaun Igreja Aimutin ne’ebé paradu dezde 2019 to’o ohin loron.

Notísia iha Relasaun : Selu ona milaun $2,5, konstrusaun Igreja Aimutin “nunca terminou”

Xefe Bairru Lissi-Butak Parókia Aimutin,  Luis Gonaga Marques, Xefe Bairru Kampung Tuty, Saturnino Guterres da Cruz, ho reprezentante sarani   Bairru Aimeti-Laran 1, Laura Barreto de Jesus, hato’o sira-nia laran la kontente haree konstrusaun Igreja foun Aimutin ne’ebé sira rasik mós mobiliza sarani sira hodi fó kontribuisaun osan uitoan.

“Desze inísiu konstrusaun Igreja ne’e iha tinan 2015, sarani Bairru Lissi-Butak ne’ebé pertense ba Parókia São José Operáriu, Aimutin, Díli, kontribui ona osan 10% ho esperansa atu bele ajuda finaliza konstrusaun igreja foun ne’e maibé realidade paradu tanba de’it,” Luis Gonzaga Marques hateten bainhira halo entrevista ho Hatutan.com, foin lalais ne’e.

Iha inísiu konstrusaun Igreja ne’e iha tinan  2015, Luis Gonzaga, Saturnino Guterres da Cruz,  Laura Barreto de Jesus , ho xefe bairru hotu-hotu ho mós responsavel sentru pastoral sira  ne’ebé hola parte iha Parokia São José Operáriu, Aimutin, Díli, hetan orientasaun husi parókia no Komisaun Harii Igreja Foun (KHIF) hodi distribui kartaun kontribuisaun ba xefe bairru 31 hodi distribui tutan ba sarani sira, tanba bazeia ba informasaun husi parókia katak Governu sei finansia de’it 90% no 10% husi Parókia maka sei responsabiliza.  

Hosi orientasaun ne’e, Xefe Bairru Lissi-Butak, Luis Gonzaga Marques, sama sai sarani sira nia uma hodi husu “ezmola” ka kobransa hodi hetan osan kontribuisaun $2,600.00 no entrega  ba KHIF ho esperansa bele hatutan finaliza konstrusaun Igreja ho tipu Igreja multi funsaun.

Iha kontribuisaun sira-ne’e ho kategoria neen (6) mak hanesan komunidade bai-bain sei kontribui hahú husi  $2.00 kada família, funsionáriu públiku  $1.00 to’o $10.00, funsionáriu privadu $2.00 to’o 10.00, emprezáriu $2.00 to’o $100.00, membru Governu mínimu $50.00 no investor boot sei halo negosiasaun.

“Kontribuisaun ne’e la obriga sarani sira, maske iha sarani balun  lakohi  kontribui,maibe barak mak hakarak kontribui tanba igreja ne’e sai hanesan mahon ba sarani Parókia Aimutin,” Luis Gonzaga Marques tenik.

Hosi  Bairru Kampung Tuty konsege halibur osan husi sarani hamutuk $3,000.00-liu ne’ebé hatama ona ba KHIF, liu husi kartaun kontribuisaun.

“Agora ami husu sarani sira atu kontribui tan mas sira dehan sira laiha ona kbiit tanba situasaun pandemia Covid-19 no krize ekonomia,” Saturnino Guterres da Cruz hateten.

Sarani Bairru Aimeti Laran 1 konsege hatama ona osan ho montante $300.00 ba komisaun KHIF, maske sarani balun de’it mak kontribui no barak sei moris susar tebes tanba ne’e sira la iha duni kbiit atu kontribui.

“Hanesan sarani la kontente tanba konstrusaun Igreja kleur ona maibé seidauk finaliza no paradu,” Laura Barreto de Jesus hateten.

Hatutan.com  halo entrevista ho xefe bairru sira seluk hanesan Bebonuk, Lurumata, Fumento1, Fumentu II, Delta I, São Miguel, Baie Lesta, maibé sira lakohi fó komentáriu, hodi dehan deit, sira la konsente ho konstrusaun Igreja ne’ebé paradu ona.

Hatutan.com halo esforsu dala-ua’in, ba hasoru direita, marka audiénsia, inklui telefone no envia short message service (SMS) ba númeru telefone privadu, atu halo entrevista ho Padre Parókia Saun José Operáriu, Aimutin, Díli,  Pe. Emanuel Lelo Talok, CMF,  maibé seidauk iha tempu no la fo resposta atu marka audiénsia entrevista.

Projetu harii Igreja São José Operáriu, foun ne’e, ho fundu sira liuhusi Fundu Sosiedade Sivíl iha tutela direta ba Gabinete Primeiru-Ministru nian.

Iha momentu serimónia hatuur fatuk-inan ba konstrusaun Igreja Aimutin foun ne’e, iha loron 28 maiu  2015, PM Rui Maria de Araújo,  afirma katak Governu investe osan $3,000,000-liu ba konstrusaun no reabilitasaun Igreja sira la’ós de’it atu haree ba aspetu ekonómiku, maibé mós hosi aspetu morál no sosiál.

Inísiu projetu ne’e Governu commit  (kompromisu) orsamentu total $3,000,000.00 no hosi total orsamentu apoiu Governu nian ne’e hela de’it ona $480,000.00 tanba Governu aloka tiha osan sorin ho montante millaun $2,5.

Fontes seluk besik ierarkia Igreja Aimutin lakohi temi naran informa katak, hafoin Hatutan.com publika notísia konstrusaun Igreja Aimutin iha edisaun sira liubá, Padre Emanuel Lelo Talok, CMF hasai keda orientasaun ba xefe bairru sira hotu ne’ebé pertense ba Paorkia São José Operariu, Aimutin, Díli atu labele no evita fó kualker komentáriu kona-ba konstrusaun igreja ne’e, tanba husi entrevista bele hamosu opiniaun oioin iha públiku. (car)

Notísia iha Relasaun : Finaliza Igreja Aimutin presiza tan milaun rua