Hatutan.com, (26 Outubru 2021), Díli—Parlamentu Nasionál (PN) liu hosi Sesaun Plenária, iha loron 26 fulan Outubru tinan 2021, autoriza Prezidente Repúblika, Francisco Guterres ‘Lu-Olo’, hodi dekreta Estadu Emerjénsia ba dala 19 iha territóriu nasionál ho durasaun loron 30, hahú loron 30 fulan Outubru to’o loron 28 fulan Novembro 2021.

Ambiente diskusaun ba estensaun Estadu Emerjénsia ba dala 19. Foto/Média PN.

Pedidu autorizasaun ne’e bazeia ba kazu Covid-19 ho númeru pasiente ne’ebé baixa iha ospitál balun iha estadu grave tanba la simu vasina.

Notísia iha Relasaun:PR Lú-Olo sei Haruka Pedidu Estensaun EE Hosi Konsellu Estadu ba PN

Iha semana ikus ne’e, kazu Covid-19 hahú redús ona maibé sei ezisti hela númeru baixa no liga ba partisipasaun vasinasaun ne’ebé sei menus hosi munisípiu balun.

Tanba ne’e, ho Estadu Emerjénsia, Governu presija iha kbiit natoon hodi halo prevensaun di’ak liu tán liuliu pontu entrada sira no aumenta númeru vasinasaun iha territóriu nasionál.

Bankada Parlamentar sira mós apoiu autorizasaun Estadu Emerjénsia ne’e hodi prevene di’ak liu tan virus ne’e.

Hosi diskusaun naruk, Deputadu-sira autoriza deklarasaun Estadu Emerjénsia liu hosi votasaun 43 votu a favór, kontra lima (5) no abstensaun 12.

Sesaun Plenária ne’e prezide hosi Prezidente Parlamentu Nasionál, Aniceto Longuinhos Guterres Lopes, akompaña hosi membru Meza sira.

Iha mós deklarasaun polítika hosi bankada Congresso Nasionál Reconstrução Timorense (CNRT) ne’ebé konsidera estensaun Estadu Emerjénsia dala sanulu resin-sia (XIX) ne’e, halo Timor-Leste tama iha lista Estadu Emerjénsia naruk liu iha mundu, maski  efeitu hosi Covid-19 iha nasaun balun maka’as liu Timor-Leste dala atus-ida.

CNRT mós konsidera deklarasaun Estadu Emerjénsia iha Timor-Leste la hatudu diferensa medida hosi Governu nian, hetok Governu aplika medida rigorozu bain-hira kazu pozitivu iha Timor-Leste foin na’in ida, maibé hamamar medida sira bainhira kazu hahú aumenta iha Timor-Leste.

Dadus jerál hosi Sentru Integradu Jestaun Krize (SIJK) ba Timor-Leste laran tomak, ne’ebé relata ohin katak, kazu detetatu foun iha haat (4) mai hotu hosi munisipiu Dili, kompostu hosi mane na’in-tolu, feto na’in-ida.

Kazu rekoperadu ohin, iha na’in-haat  no kazu ativu iha na’in 52, totál kazu konfirmadu kumulativu iha 26 de Outubru de 2021 sura hosi 21 Marsu 2020 hamutuk 19.778.

Jornalista: Vito Salvadór