Hatutan.com, (04 Novembru 2021), Díli-Tribunál Distritál Díli (TDD) liuhosi primeiru interrogatóriu, Domingu liubá, aplika medida koasaun Termu Identidade Rezidénsia (TIR) no Aprezentasaun Periódika ba arguidu Amaro “Susar” da Costa tanba deskonfia komete krime jogu ilísitu ne’ebé previstu iha artgu 322, fraude fiskál iha artigu 314 no brankamentu kapitál iha artigu 313.

Amaro “Susar” da Costa. Foto/Hatutan.com

Aprezentasaun periódika ne’ebé Tribunál aplika ba arguidu maka kada fulan rua arguidu tenke aprezenta an dala ida iha TDD.

Tuir advogadu privadu husi arguidu konsidera medida koasaun ne’e adekuadu ba nia kliente Amaro “Susar” da Costa hodi asegura prosesu investigasaun.

“Medida koasaun ne’e sufisiente hodi hein prosesu investigasaun ne’ebé la’o hela ka akautela,” advogadu Januário Martins ba Hatutan.com iha TDD, Kinta (4/11/2021). 

Iha primeiru interrogatóriu ne’e, iha alegasaun husi parte Ministériu Públiku husu ba Tribunál atu aplika medida koasaun aprezentasaun periódika fulan ida, dala ida no husi parte advogadu husu atu aplika TIR.

Maibé bazeia ba alegasaun ne’e, TDD deside aplika medida koasaun rua ba arguidu TIR no Aprezentasaun Periódika hodi asegura arguidu nia prezensa durante prosesu investigasaun.

Polísia Científica Investigasaun Criminal (PCIC) detein arguidu Amaro “Susar” da Costa iha Tersa (26/10/2021), iha Toto Bola, Hudi-laran no detein durante oras 72.

Audiénsia julgamentu ba primeiru interrogatóriu ne’e, prezide husi juis singular Alvaro M. Freitas, MP reprezenta husi Prokuradóra Lidia Soares, Rogério Viegas no arguidu hetan asisténsia legal husi Advogadu Privadu Januário Martins, Pedro Camões no João Corteral.

Jornalista : Carmelita Isaac