Hatutan.com, (10 Novembru 2021), Dili—Governu liu hosi Sekretáriu Estadu Juventude no Desportu (SEJD), prevee orsamentu ho montante rihun $40-resin, ba komemorasaun loron nasionál juventude iha ámbitu selebrasaun ba Masakre Santa Kruz 12 Novembru 1991, ba dala 30.

Selebrasaun loron istóriku ne’e, sei hala’o ho tema “Ho Espiritu  As’uwain 12 Novembru, Joven hanesan autór ida hodi proteje Timor sai hosi Covid-19”.

Atividade sira ne’ebé sei hala’o mak hanesan, kompetisaun drum band, múzika, diskursu, inklui halo mós refleksaun iha 11 Novembru, oras kalan iha Simitériu Santa Kruz.

“Selebrasaun hanesan baibain ita sei oferese misa ida Igreza Motael, depois marsa ba simitériu Santa Kruz no Prezidente Repúblika mak sei hato’o mensajen,” Sekretáriu Estadu, Abrão Saldanha, hateten iha Plaásiu Prezidensiál, Bairru-Pité, Kuarta (10/11/21).

Nune’e mós Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Lere Anan Timur, ho laran triste tanba hanoin hetan  memória no kontribuisaun hosi jornalista Max Stahl nian, ba povu Timor-Leste (TL) nia independénsia, liuhosi filmajen sira kona-bá akontesimentu Masakre Santa Kruz.

“Nia laiha karik, dala-ruma mate mós kuitadu, ema la konta. Ne’e mak ita fó ita mia tristeza boot ba sira,” Tenente Jenerál Lere Anan Timur espresa.

Lere husu ba timoroan sira atu fó onra, memória ba joven sira, nu’udár erói ne’ebé mak fakar sira nia rán, tanba nesesidade duni ba TL nia prinsípiu ba ukun-rasik aan.

Jornalista: Rogério Cárceres