Hatutan.com (14 Dezembru 2021) Díli—Tribunál Distritál Díli (TDD) iha Tersa loron 14 fulan ne’e, hala’o primeiru julgamentu ba krime danu ho violénsia ne’ebé komete hosi arguidu na’in-rua ho inisiál JF no DC, tanba baku-rahun lezadu JC nia motór iha Munisípiu Aileu.

Iha audiénsia, arguidu JF deklara faktus balun loos no balun sala, tanba momentu ne’ebá arguidu la baku lezadu, maske nia lanu.

Notísia iha Relasaun:TDD Fó Liberdade Kondisionál ba Kondenadu 70-resin

“Ha’u iha hela uma no ha’u rona kilat tarutu mak foin halai sai ba, no kaer hela maun Polísia nia kabás hodi dehan maun labele tiru. Maibé, Polísia ne’e tiru dala ida no lezadu JC mak halai to’o klaran maka monu tun to’o ain kanek,’’ arguido deklara iha julgamentu.

Arguidu mós nega katak, la’ós nia mak estraga lezadu nia motór maibé arguidu DC mak momentu ne’ebá kaer katana no baliu hodi estraga lezadu nia motór.

Hafoin rona deklarasaun arguidu, Tribunál adi’a hikas julgamentu ba loron seluk hodi kontinua rona arguidu seluk.

Antes ne’e, tuir akuzasaun hosi Ministériu Públiku (MP) katak, iha loron 29 Setembru 2018 lezadu ho nia primu sai hosi Díli ba Aileu, maibé to’o iha Aileu arguidu sira ho kodisaun lanu hapara no hateten ba lezadu halai neneik, nune’e lezadu mós tun hosi motór ba husu arguido, maibé arguidu sira baku-rahun lezadu nia motór no dudu lezadu monu tun ba rai naruk hodi fatuk tuda lezadu.

Ho asaun ne’e, ikus mai rezulta lezadu nia motór hetan estragus no lezadu hetan kanek todan, tanba ne’e MP akuza arguidu sira ba pratika krime Danu ho violénsia ne’ebé previstu iha artigu 260 hosi kódigu penál Timor-Leste.

Audiénsia julgamentu prezide hosi juís koletivu, Arjentino Luisa Nunes, José Gonçalves, Alvaro Freitas, MP reprezenta hosi Prokuradór Hernani da Costa no arguidu hetan asisténsia legál hosi Defensór Públiku.

Jornalista: Carmelita Isaac