Hatutan.com (26 Janeiru 2022) Díli—Polísia Nasionál Timor-Leste (PNTL), Unidade Patrullamentu Fronteira (UPF), hamutuk ho FALINTIL Forsa Defeza Timor Leste (F-FDTL), Polísia Militár (PM) Postu Mota-Ain hala’o serbisu sosiál ho voluntariamente konstrui uma ba komunidade iha aldeia Tolan TCL  23, Suku Batugade, Postu Administrativu Balibo, Munisípiu Bobonaro.

Komandante PM Postu Mota-Ain, Primeiru Sarjentu Lekiluru, solda hela ai-rin uma ba komunidade iha fronteira, Kuarta (26/01/22). Foto/PNTL.

Serbisu sosiál ne’e lidera direta hosi Komandante UPF, Superintendente Polísia Euclides Belo, Komandante PM Postu Mota-Ain, Primeiru Sarjentu Lekiluru, no ekipa tékniku hosi forsa rua.

Euclides Belo hateten, planu harii uma ne’e atu dignifika komunidade vulnerável sira iha aspetu seguransa sosiál.

“Intensaun atu fasilita de’it komunidade ne’ebé merese duni hetan tulun. Hanesan Timor-oan ami iha responsabilidade morál atu ajuda malu,” Hatutan.com sita deklarasaun Euclides Belo iha komunikadu.

Maski apoiu ne’e kiik, maibé UPF ho PM kontinua serbisu hamutuk presta serbisu báziku ba komunidade no garante seguransa ba sidadaun atu aproveita hodi dezenvolve moris no envolve an diretamente ba dezenvolvimentu nasionál.

Uma ne’ebé UPF ho PM halo, materiál konstrusaun mai hosi parseria PNTL nian no tulun ne’ebé sira hetan fó diretamente ba komunidade iha suku no aldeia ne’ebé merese hetan.

Komandante UPF, Superintendente Polísia Euclides Belo ho Komandante PM Postu Mota-Ain, Primeiru Sarjentu Lekiluru, hamutuk ho ekipa tékniku hosi forsa rua, konstrui uma ba komunidade iha fronteira. Kuarta (26/01/22). Foto/PNTL.

“Materiál konstrusaun ba uma ne’e mai hosi ekipa Mama Bolu, Dr. Sam no Avo Ramos Horta. Maski simples ita buka atu halo uma ne’e ho konfortável no iha loron rua nia laran komunidade bele hela ona iha uma ne’e,” Euclides Belo, hateten.

Populasaun iha área ne’e hetan difikuldade hodi asesu ba bee moos durante tinan barak nia laran. Situasaun real ne’e sempre obriga komunidade, liu-liu feto no labarik sira tenke la’o kuaze metru atus ba atus, hodi ba buka bee liu-hosi foho ne’ebé ho temperatura manas tebes.

Daudaun ne’e, ekipa konjunta PNTL no F-FDTL halo nafatin servisu vizilánsia makás hodi asegura liña fronteira, sai fatin seguru ba ema hotu.

Jornalista: Rogério Pereira Cárceres