Hatutan.com (16 Fevereiru 2022), Díli—Tribunál Rekursu (TR) hala’o lansamentu ba formuláriu deklarasaun rendimentu bens no interese, hodi fó oportunidade ba Prezidente Repúblika, Primeiru Ministru, Prezidente Parlamentu Nasionál inklui deputadu, Membru Governu ho CAC atu presta deklarasaun kona-bá rikusoin iha TR bazeia ba lei no 7/2020, 26 de Agostu kona-bá Medida Prevensaun no Kombate Korrupsaun.

Prezidente Tribunál Rekursu (PTR), Deolindo dos Santos. Foto/Hatutan.com.

Kontiudu formulariu ne’e simples wainhira ema komprende, maibe wainhira la komprende ekipa tekiku TR sei fasilita tanba formulariu online ne’e Paul Amaral maka sei halo jestaun no formulariu ne’e lao’s ema hotu asesu maibe so ema ne’ebe iha obrigasaun atu presta deklarasaun iha TR maka sei hetan asesu.

Notisia iha Relasaun:CAC Kontinua Sensibiliza Lei MPCC iha Aileu

“Komesa aban ema ne’ebé atu presta deklarasaun iha TR sei hetan kontaktu via email hosi Paul Amaral hodi informa katak deklarasaun prontu ona, maibé deklarante rasik mak sei kria seña hodi hetan asesu ba formuláriu ne’e,” Prezidente TR, Deolindo dos Santos esplika iha serimónia lansamentu, iha edifísiu TR Caicoli, Kuarta (16/02/22).

PTR hatutan, bainhira mosu dadus ba nia a’an rasik ne’ebé presiza prienxe, liu-liu deklarasaun própriu no ema hirak ne’ebé dependénsia moris ba deklarante ne’e hanesan feen, oan, subriñu no ema hirak ne’ebé nia sustenta no bainhira nia feen ka oan servisu, entaun sei mosu tán seña foun atu prienxe kona-bá rendimentu ne’ebé sira hetan.

Bainhira prienxe hotu, bele submete mai TR maibé kuandu seidauk hotu tenki guarda to’o tempu ne’ebé hotu bele submete, importante labele liu prazu loron 30 hahú aban tuir lei haruka.

Iha formuláriu online ne’e rasik, ema seluk labele hetan asesu, úniku deklarante mak bele hetan asesu tanba sei iha kódigu ne’ebé deklarante rasik mak bele hatene no uza hodi haree fila-fali formuláriu ne’ebé nia prienxe ona.

TR fó prazu loron 30 ba eis titulár atu presta sira nia deklarasaun liu hosi formuláriu online ne’e, enkuantu liu hosi loron 30 sei iha konsekuénsia legál tuir lei hateten.

Jornalista: Carmelita Isaac