Hatutan.com, (30 Marsu 2022), Díli— Konsellu Ministru (KM) aprova projetu Rezolusaun Governu nian, ne’ebé aprezenta hosi Ministru Interiór (MI), Taur Matan Ruak ho  Sekretáriu Estadu Protesaun Sivíl, Joaquim José Gusmão dos Reis Martins, ba nomeasaun Ismael da Costa Babo hodi dezempeña kargu Prezidente Autoridade Protesaun Sivíl nian, iha rejime komisaun servisu, ba periudu tinan haat, sura hosi data simu pose nian.

Reuniaun KM. Foto/media KM.

“Autoridade Protesaun Sivíl mak entidade ezekutiva iha ámbitu nasionál ne’ebé regula atividade sira hotu protesaun sivíl nian no ninia Prezidente atua nu’udár pontu fokál ho ligasaun iha nível polítiku no nu’udár responsável ba jestaun operasionál, administrativu-lojístika no finanseira ba Sistema Protesaun Sivíl tomak,” Hatutan.com sita komunikadu, Kuarta (30/03/2022).

Notisia iha Relasaun:KM Aprova Subsídiu ba Akadémiku Sira

Konsellu Ministru aprova ona projetu Dekretu-Lei ne’ebé aprezenta hosi Ministru Administrasaun Estatál, Miguel Pereira de Carvalho, kona-bá Fundu Espesiál ba Dezenvolvimentu Ataúro nian (FEDA).

Fundu ida-ne’e iha personalidade jurídika, autonomia administrativa, autonomia finanseira ne’ebé alargada no autonomia patrimoniál.

Ho nia objetivu atu finansia programa no projetu sira, anuál no plurianuál, ho karáter sosioekonómiku no sustentável tuir ambiente, ne’ebé destina ba dezenvolvimentu territóriu no populasaun Munisípiu Ataúru nian. FEDA prezide hosi Prezidente Munisípiu Ataúro no tutela hosi Primeiru-Ministru.

Tuir projetu ne’ebé aprezenta hosi Primeiru-Ministru, Taur Matan Ruak, Konsellu Ministru delibera atu autoriza loke prosedimentu aprovizionamentu nian, liuhosi konkursu públiku internasionál, ba adjudikasaun kontratu nian ba konstrusaun “Jardim da Chama Eterna”, memoriál ida ne’ebé maka ho símbolu ne’ebé aas, ho objetivu atu konsentra rekoñesimentu ba ema sira ne’ebé mate iha funu laran.

Ho deliberasaun ida-ne’e, Konsellu Ministru autoriza Arkivu no Muzeu Rezisténsia Timor-Leste, I. P. atu asume kompromisu plurianuál sira relasiona ho ezekusaun obra konstrusaun nian “Jardim da Chama Eterna”.

Jornalista: Carmelita Isaac