Hatutan.com, (22 Abríl 2022), Díli—Maski Tribunál Rekursu (TR) seidauk anunsia rezultadu ofisiál kona-bá Prezidente Repúblika eleitu, no mós serimónia pose sei akontese iha loron 20 Maiu tinan ne’e, maibé  daudaun ne’e, atuál Prezidente Repúblika Francisco Guterres Lú Olo, liuhosi nia gabinete prepara daudaun ona relatóriu servisu durante mandatu, atu entrega ba Prezidente Repúblika foun José Manuel Ramos-Horta.

Ekipa Susesu hosi Kandidatu Francisco Guterres Lú Olo hala’o konferénsia imprénsa iha Sede Nasionál kandidatura PR, Otél Lúz Clarita, Suku Grisenfor, Sesta (22/04/2022).

“Iha ha’u nia servisu fatin ami prepara daudaun ona relatóriu atu entrega, bainhira nia hato’o karta, naturalmente Prezidénsia Repúblika sei hasoru malu ho nia ekipa, atu bele ko’alia,” atuál PR, Francisco Guterres Lú Olo, hateten liu hosi konferénsia imprensa iha sede nasionál ba kandidatura, iha otél Luz Clarita, suku Grisenfor, Munisipiu Dili, Sesta (22/04/2022).

Lee mós: Embaixadór Sira Husi ASEAN Parabéniza Prezidente Eleitu José Ramos-Horta

Hanesan Xefe Estadu, Lú Olo sente orgullu ba nia an-rasik tanba kumpri ona mandatu durante tinan-lima ho dignidade.

Iha situasaun barak ne’ebé mak difísil ba Lú Olo, maibé konsege ultrapasa situasaun sira ne’e hotu hodi halo povu no rai Timor-Leste bele moris iha hakmatek.

“Nu’udár sidadaun, ha’u nia vida politika seidauk hotu. Signifika, ha’u hateke ba dook ona,” Lú Olo afirma.

Subsídiu $200 Labele Implementa

Liuhosi kampaña eleisaun Prezidensiál segunda volta, plataforma koligasaun tolu hosi Frente Revolusionáriu Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timoroan (KHUNTO), tau forsa hamutuk hodi fó apoiu ba Lú Olo ninia kandidatura ba Prezidente Repúblika 2022 to’o 2027.

Plataforma koligasaun tolu ne’e halo kompromísiu ba povu katak, sei fó apoiu subsídiu osan ho montante $200 ba kada uma-ka’in, iha fulan-Dezmebru tinan ne’e.

Infelizmente, kompromísu politika ida-ne’e labele implementa tanba kandidatu PR Lú Olo la konsege re-eleitu ba Prezidente Repúblika foun períudu 2022 to’o 2027.

“Ha’u hakarak atu hatán katak ida-ne’e ha’u nia kompromísu duni, maibé ha’u nia kompromísu ida-ne’e, bá manán nian,” Lú Olo hateten.

Iha fatin hanesan, Prezidente PLP atuál Primeiru Ministru Taur Matan Ruak dehan, seidauk tempu ba nia atu responde pergunta ne’e no husu ba jornalista sira atu bele husu fali pergunta ne’e iha tempu seluk.

“Ha’u hanoin iha tempu seluk, ha’u bele fó oportunidade ita boot sira halo pergunta. Agora ne’e ba de’it ida ne’e,” Taur Matan Ruak hateten.

Jornalista: Rogério Pereira Cárceres