Hatutan.com, (04 Maiu 2022), Díli- Prezidente Repúblika Populár Xina, Xi Jinping, hato’o nia felisitasaun ba prezidente eleitu, José Manuel Ramos-Horta no promete hametin kooperasaun bilaterál entre país rua iha futuru.

Lee Mós : Tribunál Rekursu Proklama Ramos-Horta Eleitu ba Prezidente Repúblika 2022-2027

Embaixador Repúblika Populár Xina mai Timor-Leste, Xiao Jianguo, hasoru-malu ho Prezidente eleitu, José Manuel Ramos-Horta, Kuarta (04/05/2022). Foto/Hatutan.com

Karta felisitasaun  ofisiál ne’e hato’o direita husi Embaixador Repúblika Populár Xina mai Timor-Leste, Xiao Jianguo bainhira halao sorumutu ofisiál ho prezidente eleitu iha gabinete Nobel bá Pás iha Farol, Díli, Kuarta (04/05/2022).

Prezidente eleitu, José Ramos-Horta bá jornalista sira hateten, sorumutuk ho embaixador Xina mai Timor-Leste hodi diskute kona-bá preokupasaun boot bá situasaun umanitáriu, sosiál no ekonomika iha mundu ne’ebé lori impaktu boot bá Timor-Leste.

Haree bá situasaun hirak ne’e, embaixador Xina, Xiao Jianguo promete sei kontinua halo dialogu ho lideransa nasional, prezidente republika no ho Governu atu haree oinsa kontinua apoiu Timor-Leste iha situasaun sira ne’ebé nesesita.

“Ami sei hasoru hikas malu bainhira há’u inaugura formalmente hanesan prezidente republika. Hau kontaktu nafatin ho Xina atu garante ita-nia relasaun di’ak tamba iha potensia mundial, rejional no ekonómiku ne’ebé importante bá Timor Leste nia movimentu,” José Ramos-Horta hateten.

Horta hatutan, iha sorumutu ne’e nia parte simu karta kongratulasaun  ofisial husi Xefe Estadu Repúblika Populár Xina, Xi Jinping relasiona ho nia vitória iha eleisaun prezidensiál segunda volta no eleitu ba prezidente republika periodu 2022-20227.

Iha parte seluk, embaixador Repúblika Populár Xina mai Timor-Leste, Xiao Jianguo hateten, sorumutuk ho prezidente eleitu ne’e atu hatoo deit mensajen kongratulasaun husi prezidente Xina, Xi Jinping no mensajen importante iha karta ofisial ne’e kona-bá relasaun bilaterál nasaun rua ne’ebé dezenvolve ona durante tinan 20 ikus no rezultadu hatudu iha pasu pozitivu.

“Ami iha konfiansa bá lideransa husi rai rua ne’e hotu atu relasaun entre Timor Leste ho Xina sei dezenvolve diak nafatin iha kooperasaun praktika sira ba oin,” Xiao Jianguo hateten.

Diplomata ne’e sublina iha sorumutuk ne’e ko’alia mos ho prezidente eleitu planu dezenvolvimentu kooperasaun ida di’ak bá oin tamba kooperasaun entre rai rua importante no sei haburas nafatin bá oin.

Jornalista: Vito Salvador