Hatutan.com, (12 Maiu 2022), Díli—Governu estabelese ona “Loja do Povo” ka loja povu nian atu kria merkadu ba produtu lokál, hodi asegura ai-han iha rai-laran no promove substituisaun produtu lokál sira.

Loja do Povo ne’ebé Governu estabelese iha Fomento II, Munisipiu Díli. Foto/MTKI.

Loja do povu hanesan instrumentu ida atu utiliza ba intervensaun merkadu no kontrolu infrasaun iha rai-laran.

Ministru Turizmu, Komérsiu no Indústria (MTKI) José Lucas do Carmo da Silva hamutuk ho Ministru Agrikultura no Peskas, Pedro dos Reis, hala’o ona lansamentu ba loja do povu iha Fomento II, Munisipiu Díli, Kinta, (12/05/2022).

Governu da-ualu estabelese loja do povu ne’e atu bele kria alternativa ida di’ak liu hodi diversifika ekonomia liu-hosi setór produtivu sira no atu dezenvolve ekonomia komérsiu lokál, nasionál ne’ebé reziliente, inkluizivu, diversifikadu no sustentável.

Ministru MTKI, José Lucas do Carmo hateten jeografikamente Timor-Leste lokaliza ka pozisiona iha área ne’ebé favorese tebes tanba TL iha rai, iha bee ne’ebé sufsiente atu dezenvolve setór agrikultura. 

“Timor-Leste iha poténsia bo’ot tebes ba setór produtivu sira no presiza politika ida atu bele asegura produsaun hosi setór produtivu sira hotu. Oitavu Governu konsidera loja do povu ne’e importante tebes atu bele dezenvolve setór produtivu hodi bele diversifika ekonomia ne’ebé sustentável,” Hatutan sita deklarasaun José Lucas iha komunikadu.

Iha fatin hanesan Prezidente Koopertiva Kamponezas Maubere, Almerindo Oliveira das Silva agradese ba Governu liu-liu MTKI ne’ebé fó apoiu tomak ba CCM nia servisu tanba durante tinan rua nulu nia laran TL nia konsumu nasionál depende ba ai-han importasaun.

Tanba ne’e agora MTKI hamutuk ho CCM estabelese loja do povu atu oinsa bele promove no dezenvolve setór produtivu sira nune’e Timor-Leste la bele depende de’it ba ai-han importasaun.

Timor-Leste presiza kria loja do povu nune’e bele tau konsumu rai laran sai hanesan pilotu importante ba kosumu terserál.

Durante tinan rua nulu kamponezes sira produs ai-han la iha parte relevante ruma atu tau atensaun nune’e ai-han balun estraga no dodok de’it, tanba ne’e liu hosi loja do povu ne’e bele iha alternativa ida di’ak liu hodi diversifika ekonomia liu hosi setór produtivu sira no atu dezenvolve ekonomia komérsiu lokál, nasionál ne’ebé Reziliente, inkluizivu, diversifikadu no sustentável.

Jornalista: Elio do Santos da Costa