Hatutan.com (30 Maiu 2022), Díli—Ministru Justisa (MJ), Tiago Amaral Sarmento promete katak, iha semana ne’e nia laran sei kompleta ekipamentu iha Konservatóriu Sevisu Rejistu Notariadu Díli hanesan mákina impresora, komputadór no skan hodi halo atendimentu públiku liu-liu iha prosesu produsaun sertidaun RDTL, BI, Sertidaun Kazamentu, Sertidaun óbitu (mate) inklui ratifikasaun.

Governu iha kompromisu atu kompleta tanba Konservatóriu Sevisu Rejistu Notariadu Díli enfrenta situasaun ne’e durante tinan barak ona, liu-liu fatin no ekipamentu ne’ebé la sufisiente ikus mai afeita ba sidadaun sira nia direitu hodi asesu ba dokumentu hanesan sertidaun RDTL, BI, Sertidaun Kazamentu no Sertidaun óbitu.

Lee Mós:Mákina Prodús BI iha Munisípiu Ne’en Kontinua Aat

“Iha Konservatóriu Caicoli, problema mosu iha loron Kuarta no Kinta no problema maka menus ekipamentu no fatin la sufisiente. Kuaze tinan lima resin ona mak la resolve, tanba ne’e ha’u halo ona enkontru ho sira hodi solusiona lalais liu hosi dalan primeiru maka semana ida ne’e nia laran sei buka ekipamentus atu atende. Segundu loke tán fatin ida iha Becora no Comoro nune’e bele redús ema. Terseiru iha ona hanoin atu kria rejistu online ba sira ne’ebé hatene lee no hakerek no bainhira rejistu hotu ona mak bele ba foti kartaun iha konservatóriu,” Tiago Amaral Sarmento hateten ba Jornalista sira iha nia knaar fatin Colmera, Segunda (30/o5/2022).

Orsamentu ba MJ iha tinan ida ne’e laiha fundus ba kapital menór, maibé MJ sei hato’o pedidu ba Ministériu Finansas (MF) karik iha posibilidade halo transferénsia hosi orsamentu ne’ebé alokadu ba MJ tinan ne’e nian hodi rezolve lalais problema refere.

Lee Mós : Sidadaun Sira Kontinua Forma no Sena-Malu iha Resintu Notariadu Díli

Kona-bá mákina produsaun BI iha Munisípiu neen ne’ebé avaria hanesan iha Diresaun Servisu Rejistu Notariadu Munisípiu Lautém, Viqueque, Manatuto, Liquiça, Bobonaro no Ermera, daudaun ne’e iha prosesu aprovizionamentu hodi loke konkursu manutensaun.

Lee Mós : Abitante Sira Forma Naruk no Hein Kleur Trata BI ho Sertidaun RDTL

Jornalista: Carmelita Isaac