Hatutan.com, (19 Jullu 2022), Jakarta—Prezidente Repúblika (PR), José Ramos-Horta ho nia omólogu Prezidente Repúblika Indonézia, Joko Widodo, kuda ai-an gaharu iha arredores Palásiu Prezidensiál, Bogor, Tersa (19/07/2022).

Lee Mós : Delegasaun Ramos-Horta ba Indonézia, Na’in-rua Pozitivu Covid-19

Prezidente Ramos-Horta ho Prezidente Joko Widodo kuda ai-oan gaharu iha Palásiu Prezidensiál Bogor, Tersa (19/07/2022). Foto/AntaraNews

Xefe Estadu nasaun viziñu rua ne’e la’o ain akompaña malu sai husi Palásiu Prezidensiál  hodi bá kuda ai-oan gaharu (Aquilaria malaccensis) ne’ebé preparadu ona iha Palásiu Prezidensiál nia arredores kotuk.

Bainhira to’o iha fatin kuda ai-oan gaharu, Jokowi entrega kanuru suru-rai nian bá Ramos-Horta hodi suru-rai soe bá iha rai-ku’ak ne’ebé ai gararu oan hatuur ona bá.

Hafoin ne’e, Ramos-Horta ho Jokowi foti bé iha gaiu laran hodi rega bá ai-oan gaharu ne’ebé sira na’in-rua kuda. Nune’e, Jokowi foti bé hodi fase Ramos-Horta nia liman. Nune’e, sira na’in-rua foti toalla hamaran sira-nia liman

Remata kuda ai-oan gaharu, Ramos-Horta ho Jokowi akompaña malu hodi hakat mai Palásiu Prezidensiál Bogor nia varanda hodi kontinua ho enkontru Estadu nian ne’ebé akompaña ho delegasaun Timor-Leste nian no delegasaun Repúblika Indonézia nian.

Prezidente Ramos-Horta to’o iha Palásiu Prezidensiál Bogor, purvolta  tuku 09.50 oras indonézia, ne’ebé simu husi moradór sira ne’ebé hatais roupa tradisionál ho marxa banda bainhira Ramos-Horta hakat daudaun tama bá Palásiu Bogor.

Bainhira Ramos-Horta tuun husi karreta hasoru direita prezidente Joko Widodo no sira-nain rua halo inspesaun bá formatura iha Palásiu  Bogor.

Benefísiu Gaharu

Ai gaharu nu’udár rekursu naturál  ne’ebé koñesidu ho valor ekonomia boot. Ai gaharu ne’e tama mós iha kategoria mina atsiri.

Nia morin ne’ebé iniku halo gaharu ne’e sai mós matéria prima bá kozmétiku, dupa, no sai mós matéria prima  bá asesória indústria mina-morin.

Ho teknolojia vansadu hal nasaun sira hanesan Korea, Singapura, Xina, Japaun ho  Estadus Unidus Amérika dezenvolve ai gaharu ne’e sai ai-moruk bá  rings, azma, kabun moras, antibiotik TBC ho hepatitis.

Jornalista : Vito Salvador