Hatutan.com, (30 Agostu 2022), Díli- Prezidente Repúblika (PR), José Ramos-Horta husu atu povu hotu,  lider rezisténsia no ukun na’in sira, labele haluha unidade nasionál ne’ebé hatudu iha loron konsulta populár, 30 Agostu 1999.

Sekretáriu Jerál ONU, Kofi Atta Annan fó sai rezultadu Konsulta Popular iha loron 04 fulan-Setembru 1999. Foto/Dok.ONU

Xefe Estadu ne’e hateten, nu’udár Estadu  no hanesan sidadaun nia marka prezensa  iha selebrasaun loron konsulta populár ba da-23 ne’ebé konsentra iha Jardin 05 de Maiu, Colmera, Díli, atu labele haluha momentu ida ne’ebé povu mate no luta, joven feto-mane, ferik-katuas sira tinan lubuk ida nia laran mate to’o iha aktu referendu.

Ramos-Horta hakaruk bá Fundadór FRETILIN no FALINTIL ne’ebé mohu hotu komandante FRETILIN boot sira soldadu sira, sarjentu sira, juventude sira asuwa’in Santa Krús nia kontribuisaun bá Timor Leste nia istória no bá Igreja.

“Portantu rede klandestina no kaixa klandestina sira ha’u sempre hakaruk hanoin bá sira ne’e mak ha’u prezensa iha ne’e hodi partisipa,” José Ramos-Horta hateten bá jornalista sira.

Ramos-Horta hanesan Xefe Estadu sempre prontu ko’alia ho lider hotu-hotu, prontu atu rona kuaze loron-loron sempre kontaktu malu, dala ruma  kontaktu privadu dala ruma kontaktu ofisiál, nu’udar Prezidente Repúblika nia knaar mak ida ne’e. Buka sai hanesan mahon bá partidu polítiku sira, sosiedade tomak laiha diskriminasaun polítika ka sosiál, Timor Leste moris iha dame no kontente.  

“Mundu konflitu, funu barak loos, situasaun difisil hanesan Ukránia, Yemen, Afeganistaun agora problema polítika boot. Iha pakistaun mós problema polítika, maibé Timor Leste moris nafatin iha dame no ekonomia la’o daudaun. Ha’u espera fulan ne’e mai tan nafatin hanesan ne’e, nune’e ita-nia ekonomia bele rekupera,” Ramos-Horta hateten.

Xefe Estadu parabeniza Ministeriu Administrasaun Estatál (MAE) ne’ebé mak halo preparasaun iha fulan ida tomak iha suku no aldeia sira hodi komemora loron konsulta populár bá da-23.

Pr Ramos-Horta entrega bisikileta ida bá alin feto iha selebrasaun loron konsulta populár ba da-23 iha Jardin 05 de Maiu, Colmera, Díli, Tersa (30/08/2022). Foto/Hatutan.com

Iha biban selebrasaun loron konsulta populár ne’e hahú ho marxa hosi ró-tonda Francisco Xavier do Amaral, no termina ho atividade dada sorteiu bá prémiu sira hanesan motoriza, bisikleta, risecooker, jeleira inklui prémiu seluk bá modalidade desportiva  ne’ebé durante ne’e komisaun organizadora realiza hodi komemora loron konsulta populár.

Partisipa iha serimónia komemorasaun ne’e Prezidente Repúblika José Ramos-Horta, Tenente Jenerál Falur Rate Laek, Ministru MAE Miguel Pereira de Carvalho, Ministru Justisa Tiago Amaral, Vise-Ministru Estatál Lino Torezão inklui membru Governu no populasaun sira sivíl no militár.

Loron konsulta populár, 30 Agostu 1999, sai hanesan memória istóriku no determinasaun bá Timor nia prosesu luta bá ukun rasik aan.

Tempu ne’ebá, maske populasaun liman mamuk, hamriik forma iha kilat tutun militár Indonéziu sira nian ho presaun forsada oioin to’o balun mate iha masakre laran,  maibé sira la ta’uk hodi bá vota iha Konsulta Populár ho opsaun rua; hili Autonomia ho Indonézia ka hili CNRT (Conselho Nacional Resistencia Timorense) para ukun rasik aan.

Iha sentru votasaun hamutuk 200 mak estabelese iha Timor laran tomak ho populasaun ne’ebé rejista bá vota hamutuk 451,792 no hosi total ne’e 98,5% mak ba vota.

Iha loron 04 fulan-Setembru 1999, Sekretáriu Jerál ONU, Kofi Atta Annan fó sai rezultadu konsulta populár ne’ebé hatudu katak 78,50% povu Timor-Leste hili CNRT ho haketak aan hosi Indonézia (independénsia)  no 21,50% mak hakarak simu autonomia ho Indonézia.  

Jornalista: Vito Salvadór