Hatutan.com, (17 Fevereiru 2023), Díli— Governu hamutuk ho povu Timor Leste (TL) hato’o solidariedade ne’ebé kle’an ba Povu no Governu Nova Zelándia nian ne’ebé sofre dezastre naturál, kauza hosi pasazen siklone Gabrielle.

Situasaun atuál iha Nova Zelándia. Foto/Espesiál

Nova Zelándia iha hela Estadu emerjénsia nasionál, dezde Tersa-feira, loron 14 fulan-fevereiru, tanba violentu siklone ne’ebé akontese iha país ne’e, ho rajada anin no udan ne’ebé forte hodi hamosu inundasaun no rai-monu no estragus boot ba hela-fatin, estrada no infraestrutura sira seluk.

Lee Mós: Ema Ida Mate, Uma 18 Hetan Estragu Hosi Dezastre Naturál

Siklone Gabrielle rezulta ema na’in haat mate, inklui labarik ida, ema 10.500 liu tenke sai hosi uma, ema 225.000 liu tenke hela iha nakukun laran, laiha eletrisidade ka telekomunikasaun no populasaun barak mak izolada.

Horikalan, akontese rai-nakdoko ho magnitude 6,0 iha Illa Norte parte kosta nian, besik kapitál Wellington no halo país tomak sente rai-nakdoko ne’e no to’o ohin loron seidauk iha relatóriu kona-bá estragus ka vítima sira hosi rai-nakdoko ne’e.

“Solidariedade ho povu no Governu Nova Zelándia, ne’ebé enfrenta hela dezastres naturais tanba udan boot ne’ebé forte iha semana ida-ne’e, ne’ebé provoka hosi siklone Gabrielle no halo estragus boot,” Hatutan.com sita deklarasaun Primeiru-Ministru, Taur Matan Ruak, iha komunikadu.

Portavós Governu, Ministru Fidélis Manuel Leite Magalhães mós hato’o sentidu solidariedade no korazen ba família vítima sira.

“Ami-nia sentimentu ba família hirak ne’ebé lakon sira-nia ema ne’ebé sira hadomi no ami hakru’uk ba sira ne’ebé nafatin determinadu hodi buka vítima sira ne’ebé sei moris no hodi apoia populasaun sira ne’ebé afeta hosi katástrofe ida-ne’e,” hateten.

Jornalista: Rogério Pereira Cárceres